Danjiraha Jamhuuriyadda Federaalka Soomaaliya ee dalka Ethiopia Mudane Cabdullaahi Maxamed Warfaa iyo qaar kamid ah Diblomaasiyiinta Safaaradda JFS ee Addis Ababa ayaa kulan soo dhoweyn iyo dhiiri-gelin ah ugu sameeyay xafiiska safiirka, orodyahanada Soomaaliyeed ee sanadihii lasoo dhaafay iyo bilihii u danbeeyeyba guulo heer Qaran ah uga soo hooyay Jamhuuriyadda Soomaaliya tartanada ciyaaraha kala duwan ee caalamka iyo kuwa Afrika, kuwaas oo kala ah Cali Iidow Xasan iyo Cabdullaahi Jaamac Maxamed.
Safiir Warfaa, ayaa si gaar ah shahaado sharaf dhiirigelin ah u guddoonsiiyay orod-yahan Cali Iidow isagoo ku bogaadiyay dedaalka uu ku bixiyey inuu Soomaaliya usoo hooyo guul taariikhi ah kadib tartankii Ciyaaraha Jaamacadaha Adduunka (World University Games), kaas oo kusoo geba-geboobay 04 August 2023 magaalada Chengdu ee dalka China.
Cali Iidow Xasan ayaa kaalinta 4-aad ka galay wareegga koowaad ee Orodka 1500m, isagoo si buuxda uga adkaaday orodyahanno ka kala socday Morocco, Spain, Brazil, Poland iyo Qatar.
Safiir Warfaa, ayaa dib u jalleecay taariikhdii hore ee ay Soomaaliya ku lahayd tartanka orodka caalamka iyo kuwa Afrika, isagoo tilmaamay in guusha uu soo hooyay Cali Iidow ay tahay mid taariikhi ah oo mar kale usoo hoyatay Soomaaliya, isagoo sheegay in 1987-dii ay Soomaaliya ku guuleysatay biladda orodka 1500m ee masraxa caalamka xiligaas oo Cabdi Bile Cabdi uu keenay dahabka tartankii orodka Adduunka ee ka dhacay magaalada Rome ee dalka Talyaaniga, maantana ay tahay guul kale oo soo hoyatay maadaama ay Soomaaliya ku guulaysattay kaalinta 4-aad ee orodka 1500m ee tartanka Ciyaaraha Jaamacadaha Adduunka (World University Games), taasoo uu soo hooyay Cali Iidow.
