Safiiirka Soomaaliya ee dalka Kenya Danjire Jabril Ibraahim Cabdulle ayaa soo xiray kulan diimeedka 6aad ee Ansaaru Sunna, isagoo ku booriyay Culimada in la xoojiyo la dagaallanka fikirka xagjirka ah.
Kulankan oo ay ka qeybgaleen Culimaa’udiinn si weyn looga yaqaan geyiga Soomaalida oo ka kala yimid dunida daafaheeda ayaa muddada afarta cisho ah ee uu socday looga hadlay in qofkasta ay mas’uuliyad ka saarantahay faafinta dacwada Diinta Islaamka, iyado ay ka soo qeybgaleen ku dhawaad 3 kun qof.
Qaar ka mid ah Culimada ayaa bulshada iyo ka qeybgalayaasha kula dardaarmay inay xoojiyaan wacyigelinta bulshada ee dhanka faafinta Diinta, isla markaana la joogteeyn doono qabashada kulamada nuucaani oo kale ah.
Safiirka Soomaaliya ee dalka Kenya Danjire Jabril Ibraahim Cabdulle oo soo xiray kulanka ayaa ka mahadceliyey Culimaa’udiinkii waqtigooda u huray inay bulshadooda gaarsiiyaan dacwadda Diinta Islaamka, isla markaana ka dalbaday Culimada inay u duceeyaan dalkeena iyo dadkeena Soomaaliyeed meelkasta oo ay dunida ka joogaan.
“Culimada waxaan uga mahadcelinayaa waqtigooda ee ay u hureen inay bulshadooda gaarsiiyaan dacwadda Diinta Islaamka, waxaan kaloo rabnaa in la xoojiyo fikirka lagula dagaalamayo kuwa ka been sheegaya Diinteena Islaamka, waxaana Safaaraddu ay diyaar idinla tahay inay la shaqeyso Culimaa’udiinnka Soomaaliyeed”.ayuu yiri Danjire Jabriil.
Kulan diimeedka ayaa gaba gabadiisa loogu duceeyay dadka iyo dalka, waxaana inta uu socday kulan diimeedka ay Diiinta Islaamka qaateen 21 qof.
