Danjire Jabril Ibraahim Cabdulle Safiirka Soomaaliya ee dalka Kenya ayaa kulanka uu la qaatay Wasiirka dhaqaalaha buluugga iyo Macdanta ee dalka Kenya Xasan Cali Joho waxa ay uga wada hadleen xoojinta xiriirka labada dal iyo danaha wadaaga, hanaanka Soomaaliya iyo Kenya ay isaga kaashan karaan dhaqaalaha buluugga ah, kalluumeysiga iyo macdanta intuba.
Labada Mas’uul ayaa isla gartay in gobalka uu ka jiro mustaqbal ifiya, loona baahanyahay in arrintas la dardargeliyo, gaar ahaan marka loo eego dhanka Urur Gobolleedka Iskaashiga Dhaqaalaha Bariga Afrika (EAC) oo ay Soomaaliya iyo Kenya ay qeyb ka yihiin.
Danjire Jabriil Ibraahim Cabdulle Safiirka Soomaaliya ee dalka Kenya ayaa yiri “Haddii aan mideyno awoodeena waxaan furi karnaa waxyaabo dahan oo bulshadeena faa’iidooyin u leh
Soomaaliya iyo Kenya waxaa meel gabo gabo ah u maraya heshiis is afgarad oo dhanka kalluumeysiga ah, wada hadaladan waxa ay ka turjumayaan talaabooyinka muhimka ah ee lagu xoojinayo labada dal iyo sare u qaadidda xiriirka saaxiibada ku mideysan Urur Gobolleedka Iskaashiga Dhaqaalaha Bariga Afrika”.
Wasiirka Macdanta iyo dhaqaalaha buluugga ee dalka Kenya Xasan Cali Joho ayaa dhankiisa xusay in kulanka uu la qaatay Danjire Jabriil Ibraahim uu ku soo dhamaaday jawi is afgarad ah, isla markaana ay si qoto dheer uga wada hadleen isdhaafsiga waxyaabaha ay wadaagaan labada dal ee dhinaycyada dhaqaalaha buluugga, macdanta iyo kheyraadka biyaha, lana gaarsiiyo gobalka intiisa kale.
Kulanka ayaa waxaa goob joog ka ahaa mas’uuliyiin labada dhinac ka tirsan.
Talaabadan ayaa waxa ay qeyb ka tahay dadaalada Safiirka Soomaaliya ee dalka Kenya Danjire Jabril Ibraahim Cabdulle uu ugu jiro xoojinta xiriirka labo geesoodka ah ee Soomaaliya iyo Kenya iyo tan urur goboleedka iskaashiga Dhaqaalaha Bariga Afrika. Maadaama ay dowladdu ku guuuleysatay xoojinta xiriirka diblomaasiyadeed ee dalalka Caalamka.
