Munaasabad lagu soo dhoweynayay safiirka Soomaaliya ee Suudaan Danire Cabdirisaaq Axmed Shoole ayaa maanta lagu qabtay magaalada Khartuum ee Caasimadda Dalka Suudaan.
Munaasabaddan oo si qurux badan loo soo agaasimay, isla markaana ay soo qaban qaabiyeen Midowga Ururka Ardayda Soomaaliyeed ee Dalka Suudaan ayaa waxaa ka qayb galay Jaaliyadda, Ganacsato, Cullmaa’udiin, Salaaddiin, Madaxda Ururada iyo waliba Diblomaasiyiinta Safaaradda Soomaaliya ee Dalka Suudaan.
Munaasabadda lagu soo dhaweynayay Safiir, Cabdirisaaq Shoole ayaa waxaa hadallo ka jeediyay qaar ka mid ah mas’uuliyiintii ka soo qeyb gashay munaasabada. iyagoo si wadajir ah u soo dhoweeyay Safiirka, waxayna u rajeeyen inuu la yimaado is-bedal wanaagsan.
Intii ay socotay Munaasabadda ayaa waxaa goobta lagu soo bandhigay Suugaan kala duwan oo ka hadlaysa horumarka Dalkeenna Hooyo, laguna dhiirri gelinayay shacabka Soomaaliyeed sidii ay wax u qabsan lahaayeen.
Danjire, Cabdirisaaq Axmed Shoole , ayaa gaba-gabadii goobta ka jeediyay khudbad dhinicyo badan taabaneysa, wuxuuna Soomaalida ku dhaqan Dalka Suudaan guud ahaan ka codsaday inay dhamaantood ilaaliyaan sharafta Calanka iyo magaca Ummadda Soomaaliyeed.
Safiir Cabdirisaaq Axmed Shoole oo ah aqoon yahay wax ku bartay Dalka Suudaan, ayaa ah shaqsi si weyn kaga war qabi kara xaaladda Ardayda Soomaaliyeed ee Dalka Suudaan.
Yuusuf Kashmiir
