Rome.20.December..2014.Sabti,, Safiirka Dowladda Federaalka Soomaaliya u fadhiya Dalka Talyaaniga Danjire Muuse Xasan Cabdulle oo Maanta War Qoraal ah ka soo Saarey Xafiiskiisa Magaalada Rome ee Xarunta Dalka Talyaaniga ayaa ugu horreyn hambalyo ku aaddan xuska sanadguuradii 71aad ee kasoo wareegatay maalintii la aasaasay Ciidamada Booliska Soomaaliyeed u diray Dhammaan Saraakiisha iyo Ciidamada Booliska Soomaaliyeed, isagoo ku amaanay Booliska waxqabadkii ay muujiyeen iyo sida ay ugu adeegeen Shacbigooda tan iyo markii la aas aasay maanta oo kale 20kii december sanadkii 1943.kii.
Safiirka Somalia ee Talyaaniga Muuse Xasan ayaa tilmaamay in Ciidanka Booliska uu kaalin weyn ku leeyahay hay’adaha Qaranka Soomaaliyeed ugu xilsaaran xagga ammaanka, isla markaana Boolisku yahay hooyada Ciidamada Qalabka Sida ee Jamhuuriyadda Soomaaliya.
Danjire Muuse Xasan Cabdulle Danjiraha Soomaaliya ee Talyaaniga ayaa dhanka kale isagoo ku hadlaya magaciisa iyo howlwadeennada safaaradda iyo jaaliyadda hambalyo ugu diray R.Wasaaraha cusub Cumar Cabdirashiid Cali Sharma’arke ee dhawaan uu soo magacaabaya Madaweynaha Soomaaliya Xasan Sheekh Maxamuud waxa uu u rajeeyey in uu xilkiisa ku guuleysto gudashadiisa, isla markaana uu ku bogaadiyey inuu soo dhiso Xukuumad tayo leh oo dalka ka samata bixisa dhibaatada heysata dadka Soomaaliyeed, uguna adeegta si hufan oo caddaalad ah.
Ugu dambeyntii Danjiraha ayaa hoosta ka xariiqay in Safaaradda iyo Howlwadeennadeeda diyaar u yihiin mar kasta inay la shaqeeyaan R.Wasaaraha cusub iyo Xukuumaddiisa, isagoo ka dalbaday qeybaha bulshada inay taageeraan R.Wasaare Sharmarke iyo Xukuumadda uu soo dhisi doono dhawaan, si loo gaaro hiigsiga ay Soomaaliya hiigsaneyso Sanadka 2016.
