Safiirkii hore ee Soomaaliya u fadhiyay dalka Kenya Maxamed Cali Nuur Ameeriko oo socdaal ku maraya qaar ka mid ah dowlad goboleedyada dalka ka jira ayaa sheegay in socdaalkiisa ay la xiriirto sidii uu bulshada u tusi lahaa inay dalka ka jirto Nabad, isla markaana ay shacabka isaga kala gooshi karaan meelkasta oo ay rabaan oo ay meesha ka baxday in qofka uu isku koobo in uusan aadi karin qaar ka mid ah gobollada dalka.
Maxamed Cali Ameeriko oo la hadlay Radio Muqdisho isaga oo ku sugan magaalada Dhuusamareeb ee xarunta gobolka Galguud ayaa sheegay in tani ay qeyb ka tahay socdaalkiisa uu ku marayo gobollada dalka ee uu ugu magac daray socdaalkii Nabadda, waxaana uu bulshada ugu baaqay ka shaqeynta nabad gelyada dalka.
“Waxan iminka ku suganahay magaalada Dhuusamareeb, waxa ay qeyb ka tahay socdaalkeyga aan ugu magac daray socdaalkii Nabadda, runtii bulshada ayaan rabaa in aan tusiyo nabadda jirta, socdaalkeyga halkan kuma eka, meelo kale ayaan socdaal ku tegi doonan, si diiran ayaana la igu soo dhaweeyay” ayuu yiri Maxamed Cali Ameeriko.
Maxamed Cali Ameeriko ayaa xusay in xalay magaalada Cadaado loogu sameeyay xaflad lagu soo dhaweynayay oo ay ka qeyb galeen Madaxweynaha Dowlad goboleedka Galmudug iyo ku-xigeenkiisa, isagoo tilmaamay in uu aad ugu faraxsanyahay sida loogu soo dhaweeyay dhamaan meelihii uu socdaalka ku soo maray.
Halkan ka dhageyso Wareysiga
