Wasaaradda Haweenka & Horumarinta Xaquuqul Insaanka, Marwo Sahra Maxamed Cali Samatar ayaa walaac weyn ka muujisay xaaladda Soomaalida ku sugan dalka Yemen, bacdamaa uu dagaal ka socdo dalkaas. Wasiiradda ayaa tiri “Dowladda Federaalka Waxaa ka go’an in Qaxootiga Yemen jooga wax loo qabto.”
Wasiir Sahra ayaa ku nuuxnuuxsatay in shacabka Soomaaliyeed, gaar ahaan ganacsatada iyo Qurbojoogta Soomaaliyeed looga baahan yahay inay taageeraan dadaalada Dowladda Federaalka ee ku aadan sidii Soomaalida joogta Yemen ay u heli lahaayeen gar-gaar deg-deg ah.
Related posts
Wasiirada ayaa tiri “Dowladda kaligeed wax ma qaban karto, waana waajib na wada saaran inaan u midowno gargaarka shacabkeena si ay u helaan gar-gaarka ay sida deg-dega ah ugu baahan yihiin.
Dadaal kasta oo aan wadno ee ku aadan sidii shacabkeena meel walba ay joogaan aan ugu gurman laheyn haddana waxaan u baahanahay taageerada shacabka gaar ahaan ganacsatada iyo Qurbojoogta Soomaaliyeed si qof kasta oo muwaadin ah uu u helo xaquuqda uu istaahilo.”
Wasiir Sahra oo hadalkeeda sii wadata ayaa tiri “Madaxweynaha Jamhuuriyadda Soomaaliya Mudane Xasan Sheekh Maxamud ayaa 29kii Maarso la kulmay Xoghayaha Guud ee Qaramada Midoobey, Mr Ban Ki-Moon oo waxyaabihii uu kala hadlayna ay ka mid aheyd sidii qaxootiga Soomaalida ah ee ku sugan Yemen ay hay’ada UNHCR ay ugu gurmad laheyd, tanoo ah waajibaadka Qaramada Midoobey.
Sidaas daraadeed, waxaan ugu baaqayaa hay’ada UNHCR inay si deg-deg ah ugu gurmadaan Soomaalida qaxootiga ku ah Yemen. Dowladda Federaalka waxey diyaar u tahay inay UNHCR kala shaqeyso sidii gurmadkaas loo dedejin lahaa.”
Wasiirka Haweenka & Horumarinta Xaquuqul Insaanka, Marwo Sahra Maxamed Cali Samatar ayaa hadalkeeda ku soo gabogabeysey “Waan la soconaa in qaxootiga Soomaalida ay soo gaareen dekedda Boosaaso iyo Djibouti, waxaana beesha caalamka gaar ahaan deeq bixiyeyaasha ugu baaqayaa inay si deg-deg ah ugu soo gurmadaan sidii Soomaalida qaxootiga ee dalka ku soo laabaneysa ay u heli lahaayeen hooy, raashin iyo nolol maalmeed.
Soomaalidaas intooda badan waa dumar iyo caruur oo aad ugu nugul rafaadka, loona baahan yahay inaan wax walba oo aan sameyn karno aan sameyno.
Maamulka Puntland iyo Dowladda Djibouti ma dabooli karaan baahiyaha jira sidaas daraadeed waa in gar-gaar deg-deg ah lala soo gaaraa.
Sidoo kale Dowladda Federaalka waxey ka howlgali doontaa sidii muwaadiniinta Soomaaliyeed loogu gurman lahaa oo dalkooda si nabad ah loogu soo gaarsiin lahaa, tanoo ay Dowladdu horey ugu gurmatay dadkii joogey dalalka South Sudan iyo Kenya, waxaana naga go’an muwaadiniintiina xaquuqdooda inaan u istaagno oo aan badbaadsano dadkeena meel walba oo ay joogaan.
