Munaasabadan oo lagu weyneynayay sanad guuradii Koobaad ee kasoo wareegatay markii la aas’aasay hay’adda cilmi baarista iyo kheyraadka badda Soomaaliya oo ku beegan maanta oo kale ayaa waxaa ka qeybgalay siihayaha wasiir kuxigeenka Gaadiidka badda iyo dekedaha Jamaal Xassan iyo mas,uuliyiin kale.
Gudoomiyaha Hay’adda Cilmibaarista iyo kheyraadka Badda Admiral faarax Axmed Cumar {Qare} oo ugu horeyn munaasabadda ka hadlay ayaa sheegay in hay’addan ay muhiimad gaar ah u leedahay dalkeena maadaama aan leenahay kheyraad muuqda iyo mid qarsoonba taasoo muhiim ah in dadka Soomaaliyeed lagu wacyigeliyo lagana shaqeeyo sidii loo ilaashan lahaa.
Sidoo kale Adrmiral Faarax Qare ayaa sheegay in aas’aaska haydani ay kusoo aaday xili boob xoogan lagu hayo kheyraadka badaha Soomaaliya iyadoo intii ay munaasabadu socotayna lagu soo bandhigay sawiro muujinaya kaluumeysi sharci daro ah oo kasocda biyaha Soomaaliya iyadoo ay socdaan dhismaha ciidanka badda Soomaaliya.
Siihayaha wasiir k/xogeenka dekedaha Jamaal Xassan oo goobta ka hadlay ayaa tilmaamay in dowladda federaalka Soomaaliya heer xukuumad ilaa heer baarlamaanba aysan ogolaan doonin in si sharci daro ah looga kaluumeysto biyaha Soomaaliya si loola baxo kheyraadka kujira badeena.
