Munaasabadani lagu xusay sedex sano guuradii ka soo wareegtay markii Madaxweynaha Jamhuuriyadda Federaalka Soomaaliya mudane Xasan Sheekh Maxamud loo doortay Xilka madaxweynaha Soomaaliya ayaa xalay lagu qabtay magaalada Muqdisho, iyadoo munaasabadaasi ay ka qeyb galeen xubno ka tirsan labada Gole ee Dowladda Soomaaliya iyo qeybaha kale duwan ee Bulshada Soomaaliyeed.
Munaasabadda intii ka hadashay ayaa ku dheeraatay ka sheekeynta dadaaladii balaarnaa ee Dowladda Soomaaliya u gashay samata bixinta umadda Soomaaliyeed, iyo horumarada laga gaaray dhinacyada ammaanka,waxbarashada,dar dargalinta hanaanka dowladnimo,iyo arrimo kale, kuwaa oo ay u riyaaqeen ka qeyb galayaasha munaasabadda.
Guddoomiyaha Maamulka Gobolka Banaadir Xasan Maxamed Xuseen Muungaab oo khudbad ka jeediyay munaasabadaasi ayaa sheegay in uu aad ugu faraxsanyahay munaasabadani uuna ugu hambalyeynayo madaxweynaha Jamhuuriyadda sedexda sano ee u buuxsantay, waxaana uu ilaah uu uga baryay in ku guuleeyo xilka balaaran ee Umadda Soomaaliyeed uu u hayo.
Wasiirka Warfaafinta Xukuumadda Federaalka Soomaaliya mudane Maxamed Cabdi Xayir Maareeye oo munaasabada Khudbad ka jeediyay ayaa bogaadiyay horumarka laga gaaray dhinaca Dowladnimada, isagoo sheegay in markii hore uu qabay fekirka ah in horumarka la heysto in aan la gaarin , isagoo tusaale u soo qaatay xiligii la dhaarinayay Xildhibaanada hada shaqeynaya 2012-kii oo uu tilmaamay in la waayay xili habeen ah meel lagu dhaariyo oo lagu dhaariyay sida uu tilmaamay Xerada Xalane oo waagaa mugdi eheyd laakiin Iftiin looga dhigay nalalka baabuurta, laakiin mid ka badalan taasi uu dalka uu marayo amaanteedana uu leeyahay madaxweynaha Jamhuuriyadda Soomaaliya iyo guud ahaan Dowladda.
Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo gunaanadka munaasabadda khudbad dheer oo uu kaga hadlay xaalada wadanka meesha laga yimid iyo halka loo socdo ayaa sheegay xiligii xafiiska uu imaanayay caqabada badan ay jireen oo dalka heysatay laakiin dadaal badan ay ka gudbiyeen caqabadahaasi, waxa uu si qoto dheer kaga hadlay waxqabadka mudadii sedex sano ee uu hogaanka u hayo dalka sida loogu guuleystay dhinacyada ammaanka iyo xoreynta deegaanada kooxaha xagjirka dadka ay ku dhibaateynayeen.
Madaxweynaha oo sii hadlay ayaa sheegay in dhalinyaradeena Soomaaliyeed badankoodu aysan heysan shaqo ku filan taasina sabab ay u tahay bur burkii dalka soo gaaray 1991-kii oo uu tilmaamay aabaha 30-jirka ah oo xiligaa ay eheyd in waxbarasho uu helo uusan helin taasina ay sababtay shaqo la’aantaasi hadduu shaqeeyana ay tahay in qori uu qaado ama xamaali uu noqdo, waxaana taa badalkeeda uu balanqaaday madaxweynaha in fursado waxbarasho ay u abuurayaa dhalinyarada Soomaaliyeed, waxaa uu ka hadlay dadaalka loo soo maray furista Jaamacadii umadda iyo hadda horumarka laga gaaray jaamacada oo uu tilmaamay in waqti dhow jaamacada ay bixin doonto waxbarasho lacag la’aan ah oo ah midi markii hore lagu yaqiinay.
