Iyadoo maalmahan lagu jiro Xuska Afafka Adduunyada ayaa waxa goobo badan oo dalka kamid ah lagu qabtay Xuska Afka Soomaaliga, akhriska iyo horumarintiisa.
Xaflad aad loo soo agaasimay oo lagu qabtay magaalada Muqdisho, isla markaana ay soo qabanqaabiyeen Naadiga Akhriska iyo Qoraalka Muqdisho ayaa aad loogu dhiiri geliyay horumarinta afkeena, iyada oo aad loo dul istaagay in wax la qoro lana akhriyo, waliba afkeena hooyo si uu u kabco uguna biirin luuqadaha la sheegayo in boqolaal sano ka dib dabar go,ayaan.
Madashan oo kulmisay dad badan waxa hadal kooban ka jeediyay Senator Ayub Ismaaciil Yuusuf oo ah xubin dhalin yaro ah kana tirsan Golaha Aqalka Sare ee Baarlamaanka Soomaaliya, isagoo dhiira galiyay muhiimada wax akhriska iyo qoraalka, wuxuna isdultaagay aadna u xasuusiyay dhalinyarada in ay akhriyaan Dastuurka kana doodaan dadkana u akhriyaan, kaas oo noqon doona tiirka koobaad ee Dowladnimada Soomaaliyeed.
Madasha ayaa u mahadcelisay Senatorka sida uu u garab istaago Dhalinyarada, isaga oo ka mid ahaa dadkii taabo galiyay qabsoomidda Barnaamijkan.
