Saraakiil ka tirsan ciidanka xoogga dalka ee ka howlgalla gobollada Hiiraan iyo Shabeelaha Dhexe ayaa tababar ku saabsan dhowridda xaquuqda aadanaha iyo kuwa kale loogu soo gabo gabeeyay magaalada Jowhar ee xarunta Gobolka Shabeelaha Dhexe.
Munaasabadii tababarka loogu soo gabo gabeynayay ayaa waxaa ka qeyb galay Taliyaha qeybta 12ka April ee ciidanka xoogga dalka Soomaaliyeed Jeneraal Maxamuud Maxamed Xasan Qaafoow, Taliyaha guutada Koowaad ee ciidanka Xoogga dalka Gaashanle Dhexe Ibraahim Yuusuf Nuur, Guddoomiyaha Gobolka Mudane Cali Guudlaawe iyo saraakiil kale.
Taliyaha guutada Koowaad ee ciidanka Xoogga dalka Gaashanle Dhexe Ibraahim Yuusuf Nuur ayaa sheegay in tababarka uu socday muddo 15 cisho ah, isla markaana uu ku saabsanaa habka ay ciidanka ula dhaqmayaan marka ay gaaraan goobaha shabaabka laga xoreeyay iyo kuwa kale, isagoo intaa ku daray in saraakiisha tababarka u dhamaatay ay tiradoodu gaareyso 82.
Guddoomiyaha Gobolka Shabeelaha Dhexe Cali Cabdullaahi Xuseen “Guudlaawe” ayaa tilmaamay in ay aad ugu faraxsanyihiin ka maamul ahaan howsha adag ee ay ciidamada ka wadaan deegaannada gobolkaasi ka tirsan, waxaana uu ciidamada u rajeeyay inay ka soo dhalaalaan howsha loo igmaday.
Taliyaha qeybta 12ka April ee ciidanka xoogga dalka Soomaaliyeed Jeneraal Maxamuud Maxamed Xasan Qaafoow oo soo xiray tababarka ayaa ciidamada ku booriyay inay ku dhaqmaan sharciyada la baray oo ay u hogaansamaan dhowridda xaquuqda aadanaha.
