Ugu yeraan 10 qof ayaa ku geeriyootay halka dhowr kale ay soo gaareen dhaawacyo kaidb markii uu soo dumay dhisme howl laga hayay magaalada bariga dalka India ku taala ee Kolkata (Calcutta), sida ay sheegeen saraakiil.
Wararka ayaa sheegaya in ku dhowaad 150 ruux ay ku xaniban yihiin buundo dhismo adaga ka sameysan oo ku dhacday waddo mashquul badan.
Muqaalo la baahiyay ayaa muujinayay iyadoo dadka deegaanka oo gacamahooda oo maran adeegsanaya ay ka qeyb qaadanayeen gurmadka loo sameynayo dadka dhibaatada ku haubsatay.
Sida ay soo warisay wakaalada AFP, 60 ruux ayaa ka geeyay goobaha caafimaadka kuwaas oo qaarkood la sheegay in ay qabaan dhaawacyo halis ah.
Kooxaha gurmadka deg dega ah ayaa goobta gaaray ayagoo wata eyaha wax uriya, biraha adaga ee wax lagu jabiyo, qalabka dhulka lagu qodo iyo aqabyo kale si ay u soo saaraan dadka ku go’doonsan gudaha burburka dhismaha.
Ramesh Kejriwal, waa goobjooge, waxaana uu sheegay in uu maqlay dhawaq aad u weyn oo argagax geliyay.
Goobta mashaqadan ay ka dhacday ayaa ah deegaan ku dhow, Girish Park oo ah meelaha ugu mashquulka badan magaalada Kolkata waxaa ka ak dhow dukaamo, guriyo la degan yahay iyo goobo kale isla markaana leh wadooyin aad u ciriiri badan.
Wasiirka arimaha gudaha ee dalka India Rajnath Singh, ayaa barta Twitter ku sheegay in xaaladda ay si dhow ula socdo isla markaana uu si aad ah ugu naxay markii uu soo gaaray dhacdada magaalada Kolkata.
Dhismaha dumay ayaa ku dul dhacay gawaari, dhismiyaal kale iyo dad kale oo waddada marayay, iyadoo sidoo kale uu ku dul dumay dad deganaa guriyo ku meel gaar ah oo ka ak dhowaa dhismaha.
Waxaana dhismahan dumay la sheegay in dhismihiisu socoday ilaa 2009 kii sida ay sheegtay wakaalada wararka ee Reuters.
Dalka India ayaa waxaa caanka ah dhismiyaasha duma isla markaana sababa khasaare kala duwan, iyadoo loo aanaynayo ka baaraan degin la’aan iyo dhismiyaasha oo aan xirfadeysan loo dhiseynin.
Xiggasho: BBC
