Senator Xasan Iidow Kobac oo ka mid ah Senatarada laga soo doortay Hirshabeelle ayaa hambalyo u diray Xildhibaan Cabdiraxmaan Cabdishakuur Warsame oo uu Madaxweynaha Soomaaliya Mudane Xasan Sheekh Maxamuud u magacaabay Ergeyga Gaarka ah ee u qaabilsan arrimaha Gurmadka Abaaraha Soomaaliya, kaddib markii uu qiimeeyay baaxadda iyo culeyska xilligan adag ay dadka Soomaaliyeed kala kulmayaan Abaaraha.
“Hambalyo ayaan u dirayaa Walaalkeyga Xildhibaan Cabdiraxmaan Cabdishakuur Warsame xilka loo magacaabay, waana uu mudnaa, waqti ku haboon ayaana xilka loo magacaabay”. Ayuu yiri Senator Xasan Kobac.
Senator Kobac ayaa xusay in iyagoo badan ay booqasho ugu tegeen Madaxweyne Xasan Sheekh Maxamuud oo ay ugu hambalyeeynayeen xilka, ayna ka wada hadleen arrimo ay ka midtahay dowlad dhiska dalka, isagoo ugu baaqay shacabka Soomaaliyeed inay taageeraan Madaxda cusub ee dowladda Federaalka.
Dhinaca kale Senator Xasan Iidow Kobac ayaa ka dhawaajiyay in uu kulamo gaar gaar ah la qaatay qaar ka mid ah Dhallinyarada, Aqoonyaahannada iyo qeybaha bulshada ee uu ku matalo kursiga, kuwaasi oo uu kala hadlay inay ka qeyb qaataan dib u dhiska iyo taageerada dowladda., isagoo tilmaamay inay matalaad dhab ah ku yeelan doonaan geedi socodka dowlad dhiska Soomaaliya.
