Maamulka iyo shacabka gobolka Bakool ayaa soo dhaweeyay ciidamada dhawaan tababarka loogu soo xiray degmada Tayeegloow ee gobolkaasi, ayagoo tilmaamy in tallaabadaasi ay soo dedejinayso in gobolka laga xoreeyo maleeshiyaadka Al-Shabaab.
Dowladda Soomaaliya ayaa dhawaan ku dhawaaqday in ciidamada XDS laga soo qori doono dhammaan gobollada dalka si loo helo ciidan qaran oo awood u leh difaaca waddanka.
Guddoomiyaha degmada Tayeegloow Maxamed Axmed Tool ayaa sheegay in dadka degmada ay sharaf u tahay in afar boqol oo askari oo degaanka ah ay ku biiraan ciidamada XDS, wuxuu intaa ku daray in shacabka degmada ay wali xusuusan yihiin dhibaatadii ay Al-Shabaab ku reebeen
Wasiirka Gaashaandhigga Generaal Maxamed Xasan Xaamud, ayaa tilmaamay in tababarkaan oo socday muddo gaaban ay haddana ciidamadan cusubi ka faa’iideysteen wax badan, isagoo u mahad celiyay ciidamada AMISOM ee ka socda Ethiopia oo tababarkaan siiyay ciidamada.
Dowladda Soomaaliya ayaa sanadihii la soo dhaafay gudaha dalka ku tababartay ciidamado badan oo qeyb ka noqday kuwa XDS, ayadoo dowlado saaxibbo ah oo ay ku jiraan Miwodga Yurub ay gacan ka siiyeen arrintaasi.
