Shacabka ku dhaqan Magaalada Baydhabo ee xarunta gobolka Baay ayaa maanta si aad ah u soo dhaweeyey guulihii ay ciidamada Xoogga Dalka Soomaaliyeed ka gaareen howlgallada ay dalka uga xoreynayaan haraadiga Ururka Gumaadka Umada Soomaaliyeed ee UGUS .
Ganacsatada iyo guddiyada xaafadaha magaalada Baydhabo oo kaashanaya shacabka magaaladaasi ayaa maanta magaaladaasi ka sameeyay dibad bax ay ku taageerayaan howlgallada ay ciidamadu ka wadaan deegaanno ka mid ah gobolllada koofur galbeed ee dalka.
Sidoo kale bulshada magaaladaasi ayaa isla maanta xarunta degmada Baydhabo ku soo bandhigay deeq isugu jirta raashin, dhar iyo lacago aad u farabadan oo ay ugu talagaleen ciidamada XDS ee ku jira jiidaha hore ee dagaalka.
Guddoomiyaha ururka haweenka gobolka Baay Muraayo Aadan Maddeer ayaa sheegtay in deeqdan ay iska soo uruuriyeen shacabka ku nool magaalada Baydhabo, iyadoo xustay in lagu dhiirigelinayo ciidamada XDS ee howlgallada ka wada gobollada Koofur galbeed ee dalkeenna.
Arrintan ayaa imaaneeysa xilli ciidamada XDS ay guulo wax ku ool ah ka soo hooyeen howlgallada ay dalka uga xoreeynayaan haraadiga malleeshiyaadka Shabaab “UGUS”.
