Madaxweynaha Shiinaha Xi Jinping ayaa ka digay faragelinta ciidamada shisheeye ee gobolka, iyada oo Dowladda Australia ay iska fogeysay eedeeynta sii kordheysa ee ka imaneeysa Beijing ,taas oo la xiriirta in dalkaasi uu doonayo inuu Mareykanka ka helo maraakiibta quuusta ee ku shaqeeya quwadda Nukliyeerka.
Khudbad uu Madaxweynuh Shiinaha ka hor jeediyay Ururka Iskaashiga Shanghai Jimcihii, ayuu ku boorriyay madaxda dowladaha gobolka inay gabi ahaanba ka waantoobaan waxa uu ku tilmaamay faragalin shisheeye oo lagula kaco dalkiisa.
Mr. Xi Jinping waxaa uu ballan qaaday in uu difaaci doono sarreynta sharciga hawada sare iyo biyaha badda, gaaar ahaan dhulalka Jasiiradaha ah ee la isku hayo.
Hadalladaan ayaa daba socda ku dhawaaqistii Mareykanka, ee ahaa in Ingiriiska iyo Australia ay sameystaan iskaashi xagga amniga iyo difaaca ah, iyo go’aanka Australia ee ah inay Maraykanka ay ka iibsanayaan maraakiibta quusta ee ku shaqeeya quwadda Nukliyeerka.
