Wasiirka Ganacsiga iyo Warshadaha Xukuumadda Federaalka Soomaaliya Mudane Jibriil Cabdirashiid Xaaji, ayaa maanta ka qeybgalay shir saddex geesood ah oo u dhaxeeyey wadamada Soomaaliya, Kenya iyo Itoobiya oo ka qabsoomay xuduudda Saddex geesoodka ah ee Ismaamulka Gobolka Mandera ee dalka kenya.
Shirka, ayaa ujeedkiisu ahaa daahfurka mashruuc ku saabsan sidii loo fududeyn lahaa isku socodka xuduudaha, ganacsiga iyo iskaashiga dhinacyada amniga iyo la dagaallanka Argagaxisada ee saddexda wadan.
Kulanka ayaa waxaa ka qeybgalay wafdi uu hoggaaminayey Madaxweyne ku-xigeenka dalka Kenya Mr. Rigathi Gachagua iyo wafdi Wasiiro ah oo ka kala socday dalalka Soomaaliya, Kenya iyo Itoobiya. Sidoo kale Safiirka Soomaaliya ee dalka Kenya Danjire Maxamuud Axmed Nuur Tarsan iyo diblomaasiyiin kale.
