Degmada Doolow ee gobolka Gedo ayaa shalay waxaa ka furmey shir wadatashi ah oo lagu xalinayo khilaafka siyaasadeed ee u dhexeeya siyaasiyiinta gobolka Gedo.
Wadahadalkani ayaa waxaa shir guddoominayey madaxweyne kuxigeenka Maamulka Jubbaland mudane C/llaahi Sh.ismaaciil Fartaag, waxaana shirka ย ku wehelinayay Wasiirka arrimaha gudaha iyo Amnig Maamulka Jubbaland Mudane Maxamed Faarax Warsame Darwiish, Ku xigeenkiisa C/rashiid Xasan C/nuur, Wasiirka caafimaadka Xasan Daahir Yarow iyo guddoomiyaha gobolka Jubbada dhexe Mudane C/rashiid Jire Qalinle.
Dhinaca kale siyaasiyiinta aan ku qanacsaneyn hab u socodka Maamulka Jubbaland oo kala ahaa Maxamed Cabdi Kaliil, Maxamed Yuusuf Awlibaax, C/raxmaan Axmed Amiin, Maxamuud Sayid Adan, iyo Cabdi Barre Shire ayaa iyaguna umatalayey dhinaca kale wadahadalka.
Wadahadalkani waxaa fududeynayey xubno ka tirsan urur goboleedka IGAD oo labadii maalmood ee lasoo dhaafey iyaguna ku sugnaa degmada Doolow ee gobolka Gedo.
Shirkani oo qaatey saacado badan ayaa waxaa lagaga wada hadlayey sidii guud ahaan ummadda reer Jubbaland loo mideyn lahaa gaar ahaan siyaasiyiinta gobolka Gedo ee aan iskuwaafaqsaneyn nidaamka dowliga ah ee ka jira hadda gobolada Jubbaland oo lagu wado dhawaan inay ka hirgasho dowlad Goboleed cusub iyo nidaam dhamaystiran kadib doorashada madaxweynaha Jubbaland oo dhaceysa bishan 15-keeda.
Waxaa si dhamaystiran la isugu waafaqey in loo midoobo cadowga Jubbaland la iskuna raaco dhismaha iyo in dhidibada loo taago dowlad goboleedka Jubbaland ee ay dhisteen shacabweynaha reer Jubbaland oo uu hadda hogaanka u hayo Madaxweynaha Jubbaland Mudane Axmed Maxamed Islaam waqtigiisuna ku egyahay 15-ka bishan.
Madaxda iyo siyaasiyiinta uu wada xaajoodku dhexmarey ayaa isla gartey in waxkasta lagu xaliyo wadahadal iyo Isfahan oo aysan dhicin mardanbe in warbaahinta lagu baahiyo hadalo kala jabinaya shacbiga iyo ummada reer Jubbaland ee waqtiga dheer u soo dagaalamey ka dulqaaditaanka cadowga kuna guuleystey in ay dowlad ย u dhanyihiin dhidibada u taagaan.
Wadahalkan ayaa lagu wadaa inuu soo idlaado maanta waxaan la filayaa in heshiiskan kaddib halkii lagasii ambaqaado dib u xoreynta deegaanada ku harey gacanta nabadiidka Alshabaab ayada oo uu hadda gobolka Jubbada dhexe kaliya ka dhimanyahay sadexda gobol ee Jubbaland ka koobantahay.
