Shirkan looga hadlayay horumarinta bii’ada oo ay soo qaban qaabisay xafiiska Ra’iisul Wasaaraha ee dhanka bii’ada ayaa diiradda lagu saaray sida loo ilaalin lahaa deegaanka, bulshadana loo fahamsiin lahaa ahmiyada ay bii’ada u leedahay, si loo maareeyo marka uu isbadal dhanka cimilada ah dhaco, waxaana shirka ka qeyb galay Wasiiru-dowlaha Xafiiska Ra’iisul wasaaraha ee dhanka Bii’ada, Mas’uuliyiin ka socotay Wasaaradaha Xukuumadda, xubno ka socday Qaramada Midoobay, Urur goboleedka IGAD iyo mas’uuliyiin kale.
Shirka oo socday muddo labo cisho ah ayaa la isku raacay qodobo dhowr ah oo ay ugu horeyso in Soomaaliya laga caawiyo dhanka horumarinta bii’ada.
Madaxa mashaariicda ee dhanka bii’ada iyo tamarta oo la hadlay Warbaahinta Qaranka ayaa sheegay in hay’adda UNDP ay gacan ka geysan doonto sidii hay;’adaha Soomaaliya looga caawin lahaa dhanka isbadalka ku yimaada cimilada.
“UNDP waxa ay hay’adaha dowladda Soomaaliya ka caawineysa dhanka cimiliada, horumarinta deegaanka iyo in bulshada la fahamsioyo ahmiyada bii’ada u leeyahay dalka”ayuu yiri
Saidou Hamani oo ah madaxa isku xiraha hay;adda Qaramada Midoobay u qaabilsan bii’ada ee Afrika ayaa Warbaahinta Qaranka u sheegay in uu ku faraxsanyahay socdaalka uu Muqdisho ku yimid, shirkana uu ahaa mid sare.
Saidou ayaa yiri “Muhiimadda koowaad, ama agandaha shirkan waxa ay la xiriirtaa isbadalka cimilada, waxa ay sidoo kale la xiriirtay kala duwanaanshiyaha noolaha,. Waxa ay la xiriirtay waxyaabaha kiimikada ah, waxaana la isku raacay in la sameeyo u guurgelid ama cilmi baaris”
Madaxa hay’adda daryeelka carruurta u qaabilsan Qaramada Midoobay ee UNICE u qaabilsan dhanka bii’ada Dara Johnston ayaa sheegay in carruurta Soomaaliyeed ay saameyn ku yeelanayaan isbadalka cimilada, ayna jiraan dad qabo xanuuno kala duwan.
“Saameynta isbadalka cimiliada, waa mid saameyn karta carruurta Soomaaliyeed, sidoo kale saameyneysa deegaanka, waxay kaloo saameysay biyaha, waxaa jirta kiisas aan ka helnay dadka muhaajirinta ah ee ay saameeyeen isbadalka cimilada, kuwaasi oo aan baaritaano ku sameynay, saameynta ugu weyn carruurta ayay so gaarta, marka uu dhaco isbadal xagga cimiliada ah”ayuu yiri Dara Johnston.
Wasiiru-dowlaha Xafiiska Ra’isul wasaaraha ee dhanka bii’ada Burci Maxamed Xamza aya sheegay in shirka uu socday muddo labo cisho ah, waxaana looga hadlay saameynta isbadalka cimiliada ay ku yeelan karto carrurteena iyo sida looga hortagi karo
‘Qiimeynta awoodeena ee xagga maamulka ee arrimaha bii;ada ayaa laga hadlay, waxaana la isku raacay in sare loo qaado aqoonta hay;adaha ka shaqeeya arrimaha bii’adaha, si loo maareeyo marka uu dhaco isbadal dhanka cimiliada ah”ayuu yiri Wasiiru-dowlaha xafiiska Ra’iisul wasaaraha ee dhanka Bii’ada.
