Iyadoo uu horay u jiray heshiis sadax geesood ah oo dhex maray dowladaha Soomaaliya, Kenya iyo Hay’adda Qaxootiga u qaabilsan Qaramada Midoobay ee UNHCR ayaa maanta shir u dhexeeya saddaxdaan dhinac waxaa lagu qabtay magaalada Muqdisho ee caasimadda Soomaaliya
Shirka ayaa waxaa ka qayb galay mas’uuliyiin ka kala socotay dowladda Soomaaliya iyo dowladda Kenya sidoo kale Mas’uuliyiinta hay’adda UNHCR xafiisyadeeda Soomaaliya iyo Kenya, waxaana shir guddoominayay guddoomiyaha hay’adda Qaxootiga iyo Barakacayaasha Jamhuuriyadda Soomaaliya Axmed Daahir Cabdikariim Nuur.
Shirka waxaa diiradda lagu saaray arrimaha Qaxootiga Soomaaliyeed ee ku jira xeryaha dalka Kenya iyo sidii dib loogu soo celin lahaa dalka iyadoo aan la qasbeyn.
Axmed Daahir Cabdikariim Nuur oo Warbaahinta Qaranka la hadlay ayaa faahfaahin ka bixiyay shirkaan iyo heerarkii uu soo maray iyo sidoo kale waxyaabaha uu uga duwan yahay kuwii ka horeeyay.
“Ajandaha qodobo badanaa ku jira wixii mudo dheer baa jirta sanad ayaa ka soo wareegatay oo aysan shirarku si toos ah u socon maadaama shirkii u dambeeyay wasiirada arimaha dibada Soomaaliya iyo Kenya ay gareeyeen heshiiskii ama sharciyadii gudigii ka shaqeyn lahaa arintaas shaqadii la qaban lahaa ayaa hadda loo soo dejiyay“. ayuu yiri Nuur.
Macnaheedu ma ahan xoog qofkii raba weeyaan iyadoo tasiilaadka loo baahan yahay loo abaabulayo lala kaashanayo caalamka marka in aysan dhicin muhiimadu waxay tahay in aysan dhicin dadka Soomaalida ah sadax dhinac oo gaf ah waa mar ee dadkii qaxootiga ahaa dowladii Soomaaliyeed howshoodii uma soo jeedo waa laba dowladda Kenya maalin walba in aysan dhihin dadkaani ma joogayaan ha baxaan qabkii ay ku noqon lahaayeen oo heshiis ah in lawado waa sadax oo dadka qaab wax loo qaban karo oo wax tar u noqon kara”ayuu yiri Sarkaalkaasi”
Dowladda Federaalka Soomaaliya oo caalamka kaashaneysa ayaa waday dhawaanahaanba dadaallo ay ugu jirto sidii muwaadiniinta qaxootiga ku ah dalal badan oo caalamka ah haba ugu badnaato Kenya ay dalka ugu soo celin lahayd, wuxuuna shirkaan ku soo beegmayaa iyadoo ay socdaan dadaallo Qaxootiga Soomaaliyeed ee dalka Yemen dalkooda loogu soo celin lahaa.
W/D: Axmed Cali Kaahiye
