Dalka Jabuuti waxaa goor dhaweyd si rasmi ah uga furmay wadahadalo walaaltinimo ah oo u dhexeeya Madaxda dowladda Federaalka Soomaaliya iyo walaalaheenna Somaliland.
Dhanka Dowladda Soomaaliya waxaa shirka uga qeyb galaya Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo iyo wafdi uu hoggaaminayo oo ay ka mid yihiin Guddoomiyaha Golaha Shacabka Mudane Maxamed Mursal Sheekh, Ra’iisul Wasaaraha XFS Mudane Xasan Cali Khayre, Wasiirka Arrimaha Gudaha Mudane Cabdi Maxamed Sabriye, Wasiirka Batroolka iyo Macdanta Mudane Cabdirashid Maxamed Axmed iyo masuuliyiin kale, iyo wafdi kale oo uu horkacayo Madaxweynaha Somaliland Muuse Biixi Cadi. iyadoo ay goobjoog ka yihiin Madaxweynaha Jabuuti Ismaaciil Cumar Geelle, Ra’iisul Wasaaraha Itoobiya Abiy Axmed iyo Wakiilo ka kala socday Mareykanka, Midowga Yurub iyo IGAD
Shirka oo uu marti geliyay Madaxweynaha Jamhuuriyadda Jabuuti Mudane Ismaaciil Cumar Geelle ayaa waxaa diirada lagu saarayaa sidii xal waara looga gaari lahaa tabashooyinka Walaalaheenna Somaliland.
Ummadda Soomaaliyeed meel kasta oo ay dunida ka joogto waxa ay si weyn ugu dhaga taagayaan natiijada kasoo baxi doonta shirka, waxaana laga rajeynayaa Alle idinkii inuu noqdo mid guuleysta, oo la isu laab xaaro isla markaana la isu tanaasulo, iyadoo la eegayo maslaxadda guud ee Ummadda Soomaaliyeed.
Dowladda Federaalka Soomaaliya waxaa ka go’an in xal waara oo miro dhal ah laga gaaro tabashooyinka walaalaheenna Somaliland, lana xaqiijiyo mabaadi’da Jamhuuriyadda Federaalka Soomaaliya ee ku dhisan talo wadaagga, is ogolaanshaha, cadaaladda, wadajirka iyo isku duubnida.
