Shirka barlamaanka Federaalka Soomaaliya ayaa si rasmi ah uga furmay xarunta golaha shacabka, kaasi oo uu shir guddoominayo Guddoomiyaha baarlamaanka Federaalka ah ee Soomaaliya Mudane Maxamed Sheekh Cismaan Jawaari.
Shirka baarlamaanka ayaa waxaa soo xaadirtay 230 Xildhibaan, iyadoo Ra’iisul wasaaraha Xukuumadda Soomaaliya mudane Cumar Cabdirashiid Cali Sharma’arke uu iminka ku suganyahay xarunta Baarlamaanka, isagoo lagu wado in uu mudaneyaasha ka codsado meel marinta Xukuumadda, gaar ahaan golaha Wasiirada oo ka kooban 20 Wasiir.
Ciidamada ammaanka ayaa xiray waddooyinka ku dhow xarunta golaha shacabka si ammaanka loo sugo.
Horay ayuu R/wasaaruhu baarlamaanka uga codsaday inay muddada u kordhiyaan si uu usoo dhiso xukuumad tayo leh oo dalka ka saari karta dhibaatada uu muddada ku jiray, ayadoo dhamaystiraysa shaqooyinka ay tahay in la qabto si dalka doorasho looga qabto 2016-ka.
Xukuumadda ayaa ka kooban 20 wasiir, ayadoo dib laga soo magacaabi doono wasiir ku xigeennada iyo wasiiru-dowleyaasha.
