Madaxweynaha Dowlad Goboleedka Jubbaland Mudane Axmed Maxamed Islaam ayaa maanta Shir gudoomiyay kulanka golaha Wasiirada oo lagaga hadlay qodobo kala duwan.
Ugu horayn golaha ayaa tacsi u diray dadkii ku waxyeeloobay qaraxii shalay Khawaariijta Al-Shabaab ay ka gaysteen Degmada Baardheere ee Gobolka Gedo.
Related posts
Golaha ayaa u duceeyay dadkii halkaas ku geeriyooday iyagoo Alle caafimaad taam ah uga baryay kuwa dhawaaca ah.
Golaha ayaa bogaadiyay howlgalka la isugu furayo degmooyinka gobolka Jubbaland Hoose iyadoo Wasaarada amniga ay ka warbixisay howlgalka sida uu u socdo, iyadoo Ciidamada Jubbaland iyo kuwa Xoogga dalka ay guulo waa weyn ka gaareen, isla markana isku socodka Inta badan gobolka uu caadi kusoo noqday.
Wasaaradda Howlaha Guud ayaa soo gudbisay labo sharci oo kala ah sharciga Maareynta dhulka iyo sharciga Siyaasadda Fasaxa dhulka Jubbaland oo golahu uu akhriskii koobaad ka soo samaynayo isla markana fadhiyada soo socda lagaga doodi doono.
Wasaaradda Haweenka iyo Xuquuqul Insaanka ayaa ka warbixisay xarumo lagu hormarinayo xirfadaha iyo aqoonta haweenka oo laga hirgaliyay magaalada Kismaayo si shaqo abuur loogu sameeyo haweenka.
