Madaxweynaha Dowlad Goboleedka Jubaland Mudane Axmed Maxamed Islaam ayaa shir gudoomiyay kulanka golaha Wasiirada oo lagaga hadlay howlgallada dib u xoraynta ah ee kasocda Jubbaland, xal u helidda khataraha ka dhasha kaalmaha shidaalka lagu iibiyo, xaalada gobolka Gedo iyo qodobo kale.
Golaha ayaa bogaadiyay howlgalada guulaha muuqda laga gaaray ee ay wadaan Ciidamada Jubbaland iyo xoogga dalka, kuwaas oo khasaare lixaad leh lagu gaarsiiyay argagixisada maalmahii lasoo dhaafay.
Golahu waxa uu ugu baaqay bulshada reer Jubbaland inay garab istaagan Ciidamada howlgalka ku jira oo naftooda u huraya sidii nabad iyo xornimo ay ugu noolaan lahayeen bulshada Jubbaland.
Boqolaal ka tirsan khawaariijta ayaa maalmahii lasoo dhaafay lagu dilay howlgalka socda iyadoo laga soo furtay hub iyo agab kala duwan oo ay u isticmaalayeen dhibaataynta dadka shacabka ah ee ku nool deegaannada howlgallada ay ka socdaan.
Dhinaca kale dhammaan Wasaaradaha iyo hay’adaha kala duwan ee Dowlad Goboleedka Jubbaland ayaa la faray inay sida ugu dhakhsaha badan dib ugu howlgaliyaan xafiisyadii iyo howlwadeenadii ka shaqaynayay gobolka Gedo si adeegyada bulshada halkaas loo gaarsiiyo.
Ugu danbayntii waxaa guddi gaar ah loo saaray xal u helida dabka ka dhasha Kaalmaha shidaalka lagu iibiyo, iyadoo guddigan uu qiimayn ku samayn doono habka badqabka ee goobahaas iyo inay u dhamaystiran yihiin waxyaabaha muhiimka u ah ka hortaga inuu dab ka dhasho kaalmaha shidaalka.
