Shirka Guud ee Qaramada Midoobay ayaa maanta si rasmi ah uga furmay Xarunta QM ee New York, waxaana shirweynahan ay ka qayb-galaya Hoggaamiyeyaasha 93-dowladood oo caalamka ah, iyadoo Shirkan oo ah kii 70-aad ee QM ayaa looga hadli doonaa 17-Ajande oo ay ka mid yihiin: Iliilinta Nabadda iyo Xasiloonida Caalamka, In laga Fogaado Colaadaha Hubeysan, La-dagaallanka kooxaha argigixisada ah, Ka-fogaanta Midab-takoorka iyo Ajnabi Naceybka, Ilaalinta Deegaanka, Horumarka Guud ee Caalamka iyo Arrimo kale.
Qodobbada kale ee Shirka Sannadkan looga hadli doono ayaa Waxaa ka mid ah in is-bedel lagu sameeyo Xubnaha Golaha Ammaanka ee Qaramada Midoobay iyo in Dalalka kale oo Cusub lagu kordhioy iyo Weliba Hoggaamiyihii bedeli lahaa Ban Ki Moon.
Sannadkan 2015-ka, Waxaa kaloo la filayaa in khudbadaha Madaxweynayaasha ay micno gaar ah yeeshaan, dhibaatooyinka looga hadli doono waxaa ka mid ah; colaadaha Suuriya, Yemen, Ukrain, Argigixisada, is-badalka Cimilada Dunida iyo Qaxootiga ku Qulqulaya Qaaradda Yurub.
Waxaa kaloo lagu wadaa in kulanka Maanta ay khudbado ka jeediyaan Hoggaamiyeyaasha Ruushka, Ingiriiska, Mareykanka, Baraasiil, Poland iyo Faraniiska; iyagoo ka Hadli doona Arrimaha Dimuqraadiyadda, Qaxootiga, Daacish, Is-bedelka Cimilada iyo sidii xal looga gaari lahaa dhibaatada Bariga Dhexe, gaar ahaan Khilaafka Israel iyo Falastiin.
Madaxweynaha Soomaaliya, Xasan Sh. Maxamuud oo haatan ku sugan New York ayaa ka Qayb-geli doona Furitaanka Doodaha Shir-weynaha Golaha Guud ee Qaramada Midoobay, iyadoo lagu wado inuu kulanka ka jeediy khudbad.
Waxaa kaloo uu Xasan Sheekh kulamom kala duwan la yeelan doona madaxda Caalamka oo uu ka mid yahay; Ra’iisul Wasaaraha Britain, David Cameron iyo Mas’uuliyiin kale.
Qaramada Midoobay oo shaqadeedu tahay Fududeynta Sharciyadda Caalamka, Arrimaha Ammaanka, Dhaqaalaha, Bulshada iyo Xuquuqu Insaanka. Waxaana lau Aasaasay 24-kii Oktoobar, 1945-kii, Magaalada San Francisco ee Mareykanka kaddib markii uu burburay ururkii ka horreeyay ee League of Nations, kasoo wax ka qaban-waayay Dagaalkii 2-aad ee Adduunka.
Jimciyadda Qurumaha ka dhaxeysa waxaa ay ka mid tahay lixda Hay’adood ee ka koobad tahay Qaramada Midoobay, Waxay Mas’uul ka tahay dajinta Siyaasadaha Caalamka, Waa meesha looga Codeeyo Arrimaha Ammaanka iyo Nabadgalyada Caalamka.
Dhanka kale, Waxaa shaqadeeda ka mid ah; Howlaha Nabad-ilaalinta Caalamka, Xalinta Murannada Dowladaha, Meel-marinta Miisaaniyada Qaramada Midoobey, Doorashada Xubnaha aan joogtada ahayn ee Golaha Ammaanka iyo Doorashada Xohayaha Guud ee Qaramada Midoobay kaddib soo jeedinta Golaha Ammaanka.
Ugu dambeyn, Dowlad kasta oo caalamka ka tirsan waxaay leedahay cod marka laga reebo dowladaha aan bixin lacaha is-tiraakaadka ah, Waxaana jira shan dal oo aan loo ogoleyn in ay ka codeeyaan QM, kuwaasoo kala ah: Comoros, Guinea-Bissau, Soomaaliy, Sao Tome and Principe iyo Yemen.
