Shirka horumarinta istiraatiijiyadda warbaahinta Soomaaliya, ayaa maanta ka furmay magaalada Muqdisho.
Shirkaan waxaa soo qabanqaabisay wasaaradda warfaafinta, Dhaqanka iyo Dalxiiska Soomaaliya, ayadoo ay ka qeyb galayaan wasaaradaha warfaafinta dowlad-goboleedyada, ururrada saxaafadda iyo hay’adaha caalamiga ah ee taageera saxaafadda Soomaaliya.
Wasiirka warfaafinta mudane Maxamed Cabdi Xayir “Maareeye” ayaa furay shirkaan, isagoo u mahad celiyay dadka soo qabanqaabiyay shirka iyo ka qeyb galayaasha oo ka yimid warbaahinta Soomaaliyeed.
Shirkaan ayaa daba socda shirkii qaran ee warbaahinta Soomaaliya oo bishii November lagu qabtay magaallada Muqdisho, kaas oo waxyaabihii ka soo baxay ay ku jireen in la sameeyo istiraatiijiyad qaran oo warbaahinta Soomaaliya lagu horumariyo shanta sano ee soo socota.
“Shirkaan wuxuu leeyahay laba ujeeddo, midi waa in la sameeyo qorshe 5 sano ah oo lagu horumarinayo wariyaha iyo warbaahinta Soomaaliya, tan labaadna waa in la soo bandhigo sharciga saxaafadda dalka ee dhawaan la ansixiyay” ayuu yiri wasiir Maareeye.
Shirkaan ayaa cocon doona laba maalin, ayadoo gabagabada laga soo saari doono istiraatiijiyad qaran oo shanta sano ee soo socota lagu horumarin doono warbaahinta Soomaaliyeed. Hay’adaha IMS/FOJO iyo UNESCO ayaa shirkaan ka taageeraya wasaaradda warfaafinta Soomaaliya.
