Shirkan oo ay soo Agaasimeen Hay’addaha u xilsaaran dib u eegista Dastuurka oo ay horkaceyso Wasaaradda Dastuurka ayaa waxa uu ku saabsanaa latashiga Qurbajoogta ee la xiriirta wax ka badalka cutubyada 5aad ilaa iyo 9aad ee dib u eegista Dastuurka, kaasi oo ay ka qeybgaleen dhallinyarada iyo haweenka ku dhaqan magaalada Nairobi dalka Kenya.
Hay’addaha u xilsaaran dib u eegista Dastuurka ayaa wada dadaalo ku aadan sidii Qurbajoogta Soomaaliyeed loo siin lahaa fursadooda ku aadan ka qeyb qaadashada arrimaha dib u eegista Dastuurka ee cutubka 5aad ilaa iyo 9aad.
Qaar ka mid ah dadkii kulanka ka hadlay ayaa Su’aalo ka weydiiyay wax ka badalka cutubyada 5aad ilaa iyo 9aad ee dib u eegista Dastuurka.
Mas’uuliyiintii ka socday Guddiyada Madaxa-bannaan iyo kan Baarlamaanka ee dib u eegista Dastuurka ayaa ka jawaabay suaalihi ay ka qeybgalayaashu weydiiyeen, iyagoo si kooban u sharxay heerarkii uu soo maray.
Guddoomiyaha Jaaliyadda Soomaaliyeed ee dalka Kenya Cabdiqaadir Cabdi Diini ayaa ka mahadceliyey doorka Jaaliyadda iyo sida ay fekradahooda uga dhiibteen shirkii lagu qabtay magaalada Nairobi.
Senetar Xasan Xuseen Xaaji oo ah xubin ka tirsan Guddiga Baarlamaanka ee la socodka Dastuurka ahna Wakiilka Guddoomiyaha Guddiga oo xiray shirka labada maalin ka socday Nairobi ayaa ka qrybgalayaasha u xaqiijiyey in golayaasha dowladda la horgeyn doono aaraahdooda ku aadan wax ka badalka 5ta cutub.
