Shirka kaalinta qurbo joogta Soomaalida ay ka gaysan karto dib u dhiska iyo dib u heshiisiinta dalka ayaa maanta lagu soo gabagabeeyay magaalada Kigali ee caasimadda dalka Rwanda, kaasi oo laga soo saaray qodobo dhowr ah.
Shirka oo socday muddo shan cisho ah ayaa loogu magac-daray ‘Shirka wada-tashiga siyaasadda qurbo-joogta ee horumarinta Soomaaliya.
Kulanka ayaa gaba gabadiisa la isku afgartay in la meel mariyo qodobo dhowr ah oo ay ka mid ahaayeen in Jaaliyadda ay iska arruuriyaan lacag dhan lix boqol kun oo doolar oo lagu maareeyo, isla markaana shaqooyin loogu abuurayo haweenka ku dhaqan goobaha laga xoreeyay maleeshiyada Al-Shabaab iyo in la mideeyo qurbo joogta Soomaaliyeed meelkasta oo ay dunida kaga noolyihiin.
Lataliyaha dhanka siyaasadda xafiiska Qurbo joogta Soomaaliyeed ee Wasaaradda Arrimaha dibadda Mudane Cabdixakiin Ceynte ayaa sharaxaad ka bixiyay waxyaabaha shirka ka so baxay.
“In qurbo joogta ay ka qeyb qaadato, horumarinta cadaaaladda, waxbarashada, adeegyada caafimaadka, Maamul wanaagga iyo dowladnimada, sidoo kale in ay horumariyaan ganacsiga gudaha dalka iyo ka qeyb qaadashada u gar gaaridda dadka tabaaleysan” ayuu yiri Cabdixakiin Ceynte.
Shirkan oo ah kii labaad ee lagu qabto dalka Rwanda ayaa sanadkan waxa uu kaga duwanaa kii hore in la meel mariyo qodobada ka soo baxay shirka, si sanadka 2016-ka ay u noqdaan kuwa la fuliyay.
