Maareeye Ku-xigeenka Guud ee Hay’adda Aqoonsiga iyo Diiwaangelinta Qaranka (NIRA), Mudane Cabdiraxmaan Saciid ayaa ka qaybgalay Shirka Sagaalaad ee Maareeyayaasha Jinsiyadda iyo Aqoonsiga ee Jaamacadda Carabta, kaas oo lagu qabtay magaalada Tunis ee Jamhuuriyadda Tunisia, inta u dhaxeysay 19–20 Agoosto 2026.
Shirka ayaa looga hadlay arrimo ay ka mid yihiin casriyeynta nidaamyada aqoonsiga, astaamaha farsamo iyo kuwa amni ee kaararka aqoonsiga ee dalalka Carabta, ilaalinta xogta shakhsiga ah, amniga xogta, iyo is-weydaarsiga khibradaha hay’adaha ay khuseyso.
Ka qaybgalka Hay’adda NIRA ayaa qayb ka ah dadaallada Hay’addu ku xoojinayso horumarinta iyo casriyeynta nidaamka Aqoonsiga Qaranka, iyadoo laga faa’iidaysanayo khibradaha iyo hababka casriga ah ee gobolka iyo caalamka.
