Shirka wada-tashiga Qorshe Howleedka 2021-2022 ee Istaraajiyadda Xalka Waara ee Dowlad Goboleedka Hirshabeelle ayaa maanta lagu soo gaba gabeeyay Magaalada Jowhar.
Wata-tashiga oo socday muddo saddex cisho ah waxaa diiradda lagu saaray diyaarinta Qorshe Howleedka Istaraajiyadda Xalka Waara ee Dowladd Gobaleedka Hirshabeelle iyada oo ay ka qayb galeen Wasaraadaha iyo hay’adaha ay qusayso ee Dowlad Gobleedka Hirshabeelle iyo Xubno ka socday Xafiiska Xalka Waara ee Waaaradda Qorsheynta Qaranka oo gacan wayn ka geystay dar dargalinta tallaaboyinka wax looga qabanayo mushaakilaadka kala duwan ee keena masiibooyinka dabiiciga ah sida Abaaraha, Fatahaada iyo Masiibooyinka dabiiciga ah sidii wax looga qaban lahaa .
Agaasimaha guud ee Wasaaradda Qorsheynta ee Dowlad Gobaleedka Hirshabeelle Mudane Cabdullaahi Maxamed Xasan ayaa yiri “Deegaannada maamulka Hirshabeelle waxaa laga qabtay howl ballaaran oo wax ku ool ah, taas oo ah sidii xal loogu heli lahaa dhibaatooyinka kala duwan loo maarayn lahaa waxyaabaha keena barakaca iyo sidii loo garab istaagi lahaa dadka uu saameeyay barakaca ka dowlad gobaleed ahaan waxaan diyaarinay oo ah qorshe howleedka Istaraajiyadda xalka waara ee lagu xaliyo dhammaan dhibaatooyinka kor ku xusan”.
Marwo Sahra Cabdi Maxamed Agaasimaha Xafiiska Xalka Waara ee Wasaaradda Qorsheynta Qaranka ayaa tilmaantay in dadaal dheer la galiyay diyaarinta Qorshe Howleedka 2021-2022 ee Istaraajiyada Xalka Waara ee Dowlad Gobaleedka Hirshabeele.
“Waxaan ku faraxsan nahay maanta in aan soo dhammaynay qorshihii wax loogu qaban lahaa dadka barakacyaasha Hirshabeele, qorshahaasi oo loogu golleeyahay in loo helo mashaariic horumarineed, waxaan uga fadhinnaa Wasaaradda Qorsheynta Hirshabeele in ay u samayso wasaaradaha guddi hoosaadyo xiriiriye howlaha socda ee arrimahaan. Qofka barakaca ah waa inuu noqdaa qof wax ku ool ah oo isku filan, bulshada wax ku soo kordhiya si taasi u suurta gasho waa in loo u midoobo oo la iska kaashado si Xal Waara loo helo”. Agaasime Sahra
Tani waxaa ay qeyb ka tahay Qorshe Howleedyada Istaraajiyada Qaran ee Xalka Waara oo dhammaan Dowlad Gobaleedyada iyo Gobalka Banaadir laga samayn doona iyada oo Dowlad Gobaleedka Hirshabeele ay noqotay Maamulkii ugu horeeyay ee lala diyaariyo Qorshe Howleeedka Istaraajiyada Xalka Waara ee 2021-2022.
