Shirkii Madasha wada tashiga Qaran ee maalmihii la soo dhaafay ka socday magaalada Kismaayo ayaa maanta la soo gaba gabeeyay, iyadoo lagu balamay kulamo kale.
Dr. Cumar Cabdirashiid Cali Sharma’arke R/wasaaraha dalka ayaa warbaahinta u sheegay in shirka la soo gaba gabeeyay, isagoo xusay in dib loo balamay, waxaana uuna tilmaamay in Xukuumaddiisa ay dib ka soo sheegi doonto waqtiga la isku soo laaban doono.
Ra’iisul Wasaaraha oo hadalkiisa sii wata ayaa sheegay in shirka uusan ka soo bixin War-murtiyeed, isagoo intaa sii raaciyay in xafiiskiisa uu soo saari doono war-murtiyeedka shirkaasi kaddib marka uu tago Muqdisho.
Madaxweynaha Soomaaliya mudane Xasan Sheekh Maxamuud, Guddoomiyaha Baarlamaanka, R/wasaaraha iyo Madaxda maamul goboleedyada ayaa lagu soo waramayaa iney dhawaan ka soo ambabaxeen magaalada Kismaayo.
Shirkaasi madasha wadatashiga ee Afartii maalmood ee la soo dhafay ka socday ayaa waxaa ka soo muuqanayo rajo wanaagsan maadaama madaxda ka qeybgaleysay shirkaasi ay muujiyeen isu tanaasilid kaddib markii ay ka soo dabceen qodobadii la isku hayay ee markii hore lagu kala aragti duwanaa.
