RADIO MUQDISHO: Waxaa magaalada Washington DC si guul ah ugu soo gabagaboobay shirkii sadanlaha ahaa ee xilliga gugga ee IMF iyo Bangiga Adduunka, shirkaas oo uu ka qeyb galay Wasiirka Wasaaradda Maaliyadda Dowladda Federal ka Soomaaliya Mudane Biixi Imaan Cige iyo Wafdi uu hoggaaminayay oo Dowladda Soomaaliya ku matalayay shirkaas.
Joogiyaankii Wafdiga dowladda Soomaaliya ee Washington waxaa u suuro gashay in ay ka qeyb galaan dhammaan fadhiyadii loo dhamaa ee IMF iyo Bangiga Adduunka. Sidoo kale waxaa si guul ah ku soo dhamaaday wada-hadallo ku dhawaad lix dowladood oo muhiim u ahaa hannaanka dib-u-habeynta dhaqaalaha Soomaaliya.
Wasiirka Maaliyadda XFS Mudane Biixi Imaan Cige ayaa sidoo kale intii uu ku sugnaa Washington waxaa uu si rasmi ah ula soo wareegay xilka Guddoonka Wasiirada Maaliyadda Madasha Iskaashiga Geeska Afrika oo Soomaaliya ay hoggaamin doonto labada sano ee soo socota.
Magaca Dowladda Soomaaliya, waxa uu mudnaan gaar ah ku leeyahay marka la joogo shirarka IMF iyo Bangiga Adduunka, iyadoo hay’adaha ka shaqeeyo dhaqaalaha Adduunka ay Dowladda Soomaaliya u aqoonsan yihiin dal ku dayasho mudan marko loo eego waddadii laga soo maray hannaankii deyn cafinta iyo habka dib-u-habeynta Maaliyadda oo horumar balaaran laga sameeyay saddexdii sano ee la soo dhaafay.
