Siihayaha Safaaradda Soomaaliya ee Dalka Uganda Mudane Cabdiwali Cali Faarax ayaa ka qayb galay xaflad balaaran oo loo sameeynayay dufcadii 16-aad ee ka qalin jabisay Jaamacadda Kambala (Kampala University KU ), qalinjabiyaasha oo kor u dhaafayay kumanaan ayaa waxaa ka mid ahaa 331 arday oo Soomaali ah oo kulyado kala duwan ee jaamacadaas ka qalin jabiyay.
Ardayda Soomaalida oo ahaa ardaydii ugu badnaa iyagoo kaalinta sadaxaad ka galay dhanka tirada qalin jabiyaasha oo ay ka horeeyeen oo kaliya Uganda iyo Koofurta Sudan, waxa ayna ahaayeen ardayda Soomaalida kuwa ka dhex muuqda qalin jabiyaashii halkaas ku sugnaa
Cabdiwaaxid Cali Bootaan oo ah gudoomiyaha ardayda Soomaalida ee Jaamacadda Kambala oo saxaafadda goobta qalinjabinta kula hadlayay ayaa sheegay in maanta Soomaalida taariikh u tahay oo arday intaas la eg ugu qalin jabinayaan jaamacadaas oo ah jaamacada ugu tayada wanaagsan dalkan Uganda.
Siihayaha Safaaradda Soomaaliya ee Uganda Mudane Cabdiwali Cali Faarax ayaa dhankiisa saxaafadda u sheegay in aad ugu faraxsan yahay in uu kasoo qayb galo farxadana la qaybsado arday intaas la eg oo Soomaali ah oo hal jaamacad ka qalin jabinaya
Cabdiwali ayaa hambalyo u diray dhamaan arday isagoo u rajeeyay in ay ay waxbarashada sii wadaan sidoo kalena ay ka qayb qaataan dhismaha dalkooda Soomaaliya si horumar iyo barwaaqo loo gaaro
Ugu dambayntii xafladaas ayaa ahayd mid xasuus wayn u lahayd ardayda qalin jabinaysa oo madax dalkooda matalaya farxadda la qaybsanayeen.
