Hay’adda Cilmi baarista iyo badaha Soomaaliya ayaa maanta siminaar ku saabsan ka hortagga wasaqda lagu shubayo badda u soo gabo gabeeyay qaar ka mid ah shacabka ku nool degmada C/casiis ee gobolka Banaadir.
Siminaarkan oo socday muddo saddex cisho ah, isla markaana lagu baranayay sida looga hortagi karo wasaqada lagu shubayo xeebaha dalka iyo dhibaatooyinka ka dhasha oo ay bixinayeen macalimiin taqasus u leh arrimahasi ayaa lagu soo gbao gabeeyay degmada c/casiis, iyadoo ay ka qeyb galeen mas’uuliyiinta hay’adda cilmibaarista iyo badaha Soomaaliya, maamulka degmada C/casiis iyo xubno kale.
Dadkii ka qeyb galay siminaarka ayaa tilmaamay inay aad ugu faraxsanyihiin in loo qabto siminaar lagu wacyi gelinayo ka ka hortagida wasaqda lagu shubayo xeebaha dalka, ayna gacan ka geysanayaan sidii arrimahaasi looga hortagi lahaa
Guddoomiye ku-xigeenka degmada C/casiis ee dhanka arrimaha bulshada Eng, Maxamuud Cabdullaahi Axmed ayaa sheegay in ka maamul ahaan ay balan qaadayaan in bulaacadaha aan mar dambe lagu shubi doonin xeebta, ayna sharciga la tiigsan doonaan cidkasta oo ay arrimahaasi ku arkaan.
“Casharada halkan aan ka bartay waxaa ka mid ahayd wasaqeynta badda, reer C/casiis hadaan nahay, kan maamul ahaan bulaacad magaalada laga keenay inaan xeebta lagu shubi doonin, sidaas oo kale khamiistii iyo jimcihii waxaan sameynay inaan qaadno bacaha ay dadka jalaatada ka cunaan oo aan ognahay inay kiimiko ku jirto”ayuu yiri Guddoomiye ku-xigeenka,
Guddoomiyaha Hay’adda Cilmibaarista iyo badaha Soomaaliya Admiral faarax Axmed Cumar {Qare} ayaa tilmaamay in siminaarkan uu yahay sidii bulshada ku dhaqan xeebaha magaalada Muqdisho loogu qaban lahaa wacyi gelin ku saabsan ka hortagga wasaqda lagu shubayo xeebaha dalka.
“Sidaas awgeed ayan bilownay inaan abaabulno wacyigelin duruus lagu baranayo, oo aan ka bilownay degmada C/casiis, kaasi oo socday muddo saddex cisho ah, dhibaatada bada lagu hayo ayaa keentay inaan u qabano, waxaana ka dignay in aan qashinka lagu shubin, bulaacadaha aan lagu shubin iyo lagana ilaaliyo dhiiga kawaanada xoola qalka ah, waayo dhibaatooyin ayay keenayaan, sababtoo ah laguma qubeysan karo” ayuu yiri Faarax Qare.
Siminaarada nuucaani oo kale ayaa ah kuwa lagu baraarujinayo bulshada Soomaaliyeed inay ka hortagaan wasaqda lagu shubayo xeebaha dalka
