Shacabka Soomaaliyeed ee ku nool dalka Uganda gaar ahaan Caasimadda Kampala ayaa soo dhaweeyay taageerana u muujiyay hoggaanka Baarlamaanka Dowlad Goboleedka Soomaaliyeed ee Galmudug oo horkacayo Dr. Maxamed Nuur Gacal Guddoomiyaha Baarlamaanka ee shalay Dhuusamareeb lagu doortay.
Dadkan oo la hadlay Warbaahinta Qaranka Xafiiskeeda Kampala ayaa sheegay in Galmudug heshay hoggaan Baarlamaan oo aqoon leh, kaasoo samata bixin kara Galmudug, isla markaana dajin kara sharuucda Maamulka.
Dr. Maxamed Nuur Gacal Guddoomiyaha Baarlamaanka Galmudug ayey ku tilmaameen in uu yahay aqoonyahan ka soo bixi kara howsha loo idmaday oo ku taqasusay cilmiga dajinta sharuucda iyo qawaaniinta, waxa ayna sheegeen in markan Galmudug wadadi horumarka cagta saartay.
Shacabkan ayaa sidoo kale soo dhaweeyay qaabka ay ku socoto doorashada Galmudug oo ah mid xor iyo xalaal ah oo si nadiif ah loo tartamayay, waxa ayna u rajeeyeen in guulo laga gaaro inta hartay.
Ugu dambeyntii shacabka la hadlayay Warbaahinta Qaranka ayaa ugu baaqay hoggaanka Baarlamaanka Galmudug in ay ka shaqeeyaan horumarinta Galmudug iyo Baarlamaankeeda.
