Guddiga Ololaha Gurmadka Abaaraha Somalia ee magaalada Tromsø ayaa lacag dhan 5,070$ oo u dhiganta 41,235NOK usoo diray Guddiga Qaran ee Gurmadka Abaaraha Somalia iyadoo munaasabadda deeqdaasi lacageed lagu wareejinayay oo lagu qabtay xarunta Masjidka Alraxma Tromsø uu qadka telefoonka qaab muuqaal ah uga qeybgalay Sh.Bashir Axmed Salaad Guddoomiyaha Hay’adda Culimada Soomaaliyeed kana mid xubnaha Guddiga Qaranka ee abaaraha Somalia.
Guddoomiyaha Guddiga Ololaha Gurmadka Abaaraha ee magaalada Tromsø Mohmed Abdulkadir Dahir (MCD) ayaa sheegay in lacagtaas ay iska soo uruuriyeen dad Soomaaliyeed oo ku nool magaalada Tromsø iyo walaalaha muslimiinta magaalada Kuwaas oo ka damqaday abaaraha iyo macluusha ka jirta Somalia ee aafeysay dadka iyo duunyada, lacgtaas ayaa lagu soo uruuriyey muddo 11-maalmood ah si loogu caawiyo dadka dhibateysan.
Lacagtaasi ayaa waxaa diray wakiilka Dahabshil ee Tromsø ahna guddoomiyaha Guddiga masjidka Al-Rahma Tromsø Adam Cabdullahi Diiriye kaasoo si toos ah ugu shubay lacag dhan $5,070 dollar Account-ka ay Guddiga qaranka Abaaraha ku leeyihiin Dahabshil MUQD0036051.
Wakiillada iyo abaabuleyaasha Guddiga Ololaha Gurmadka Abaaraha Somalia ee Tromsø iyo odeyaasha magaalada oo ay kamid yihiin Axmed Siraad,Xasan Ceydid,Cabdullahi Afrax ,Adam dirie iyo Ismail Moallim Ahmed ayaa kamahdceliyey doorka iyo juhdiga ay bixiyeen guddiga si loo kaalmeeyo dadka soomaalida ee u dhimanaya harraadka iyo gaajada.
Sh Bashir Axmed Salad Guddoomiyaha Hay’adda Culimada Soomaaliyeed kana mid ah guddiga heer Qaran ee Gurmadka Abaaraha Soomaaliya
oo si toos ah oo muuqaal ah uga qeybgalay wareejinta lacagtaas ayaa uga mahdceliyey dadka soomaalida ee reer Tromsø kaalinta ay ka qaateen inay lacagtaasi iska soo uruuriyaan kuna taakuleeyaan walaalahood ku dhibaateysan meelo badan oo dalka kamid ah waxa uuna xusay in weli ay dhibaatada abaartu sii xoogeysaneyso loona baahanyahay in gurmadka lasii wado lana laba jibaaro, waxa uu intaasi ku daray in lacagtaasi ay gaari doonto dadka ubaahan islamarkaana ay kamid noqoneyso lacagaha ay qurbajoogta soo direen laguna caawinayo dadka ay abaartu halakeysay.
Sh.Bashir Axmed Salad ayaa guud ahaan shacbiga Soomaaliyeed ugu baaqay inay ka qeybqaataan gurmadka abaaraha kuna tabarucaan wax kasta oo ay awoodaan oo lagu badbaadin karo dadkaasi.
