Kulan billow ah ayay shalay oo Sabti ahayd (22 June) iskugu yimaadeen Caasimadda Muqdisho Guddi farsamo oo kala matalayay Dowladda Federaalka Soomaaliya iyo Howlgalka Kaalmaynta Qaramada Midoobay ee Soomaaliya (UNSOM) oo lagaga xaajonayay qorshaha kala guurka ee UNSOM, si loo suurageliyo unkidda xafiis Q.M ay ku yeelato dalka oo la mid ah kan ka dhisan dalalka kale.
Labada guddi ayaa looga fadhiyaa dejinta jadwal UNSOM looga wareejinayo howlaha ay ka fuliso Soomaaliya.
Howlaha xafiiska siyaasadda Qaramada midoobay waxaa qaarkood la wareegi doonta Dowladda Federaalka Soomaaliya, qaar kalena waxaa sii wadi doona Xafiiska Qaramada Midoobay ee kan beddeli doona oo ah mid la nooc ah xafiisyada Q.M ay ku leedahay dalalka caalamka badankood.
Guddiga farsamo ee Soomaaliya oo ay xubno ka yihiin mas’uulyiin ka socda Xafiisyada Madaxweynaha, Ra’iisal Wasaaraha, Wasaaradaha Arrimaha Dibadda iyo Amniga Qaranka, waxaa hoggaaminya Danjire Yusuf-Garaad Cumar Axmed, dhinaca UNSOM, inkasta oo Ergeyga Gaarka ah ee KMG ee Xoghayaha Guud ee Q.M, Danjire James Swan, uu khadka telefoonka uga qeybgalay isaga oo jooga New York, waxaa hoggaaminayay George Conway oo ah ku Xigeenka Eregyga Gaarka ah ee Xoghayaha Guud ee Qaramada Midoobay.
Tallaabadani waxay astaan u tahay horumarka ay Soomaaliya ka gaartay hannaanka dowladnimada kadib qaran-burburkii dalka 1991, iyada oo sanadka nagu soo fool leh ee 2025 ay Soomaaliyaa xubin buuxda ka noqon doonto Golaha Ammaanka ee Qaramada Midoobay.
