RADIO MUQDISHO:-Jamhuuriyadda Federaalka Soomaaliya ayaa si rasmi ah u gudbisay dukumentiga ansixinta Heshiiska Dhismaha Aagga Ganacsiga Xorta ah ee Qaaradda Afrika (AfCFTA), iyadoo sidaas ku noqotay dalkii 50-aad ee xubin rasmi ah ka noqda Heshiiska.
Wasiirka Ganacsiga iyo Warshadaha ee JFS, Mudane Amb. Gamal Mohamed Hassan, ayaa dukumentiga ansixinta si rasmi ah ugu gudbiyey Midowga Afrika, munaasabad ka dhacday xarunta Midowga Afrika ee magaalada Addis Ababa.
Gudbinta dukumentigan ayaa soo gebagebeysay hannaanka rasmiga ah ee ansixinta Heshiiska, kaddib markii uu ansixiyey Baarlamaanka Federaalka Soomaaliya, isla markaana uu saxiixay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud.
“Maanta, Soomaaliya waxay noqotay dalkii 50-aad ee xubin rasmi ah ka noqda AfCFTA. Hawsha inoo taalla hadda waa inaan diyaarinno habraacyada canshuuraha iyo kastamka, ganacsatada Soomaaliyeedna ka taageerno buuxinta shuruudaha ganacsiga muddada dheer, una dhaqaaqno dhoofinta shixnaddeena ugu horreysa ee aan ku fulineyno Heshiiska. Ansixintan waxay horseedaysaa suuqyo ballaaran, ganacsi xooggan iyo shaqo abuur badan,” ayuu yiri Wasiir Gamal.
Ka mid noqoshada AfCFTA waxay ganacsiyada Soomaaliyeed u furaysaa fursado ay ku gaaraan suuqyada qaaradda, ku soo jiitaan maalgashi shisheeye, ku kordhiyaan wax-soo-saarka iyo dhoofinta, ugana qayb qaataan silsiladaha qiimaha ee gobolka, si loo taageero horumarka dhaqaale ee dalka.
Wasaaradda Ganacsiga iyo Warshadaha ayaa hoggaamin doonta hirgelinta Heshiiska, iyadoo diiradda saari doonta waafajinta waajibaadka AfCFTA ee shuruucda iyo habraacyada dalka, xoojinta isku-dubbaridka hay’adaha iyo diyaarinta ganacsatada Soomaaliyeed si ay uga faa’iidaystaan fursadaha ganacsi ee Heshiiska.<br>Si hawshan loo dardargeliyo, Wasaaraddu waxay dhistay Xafiiska Qaranka ee Isku-dubbaridka AfCFTA (NCO), kaas oo hoggaamin doona isku-dubbaridka iyo dhaqangelinta Heshiiska. Xafiisku wuxuu fududeyn doonaa wada-shaqeynta hay’adaha federaalka, dowlad-goboleedyada, ganacsatada iyo daneeyayaasha kale, si shuruucda, siyaasadaha iyo habraacyada ganacsi ee Soomaaliya loo waafajiyo waajibaadka AfCFTA.
Dowladda Federaalka Soomaaliya waxay mahadnaq u jeedinaysaa Baarlamaanka Federaalka Soomaaliya, Madaxtooyada Jamhuuriyadda, Guddiga Midowga Afrika, Xoghaynta AfCFTA iyo dhammaan saaxiibbada gudaha iyo kuwa caalamiga ah ee Soomaaliya ku taageeray hannaanka ansixinta Heshiiska.
