Garowe, 19 Febraayo, 2015 Ururka Suxufiyiinta Qaranka Soomaaliyeed iyo Ururka Horumarinta Warbaahinta dalka Finland ee VIKES oo kaashanaya Ururka Saxafiyiinta Puntland (MAP) ayaa tababar soconayay saddex cisho, oo diiradda lagu saaray Mabaadii’da saxaafadda, Xorriyadda Hadalka iyo Anshaxa saxaafadda ayaa maanta oo Khamiis ah 19 Febraayo, 2015, 30 weriye loogu soo gebagebeeyay Garowe, Caasimada Maamulka Puntland.
Tababarkan oo ah kii ugu horeeyay ee ay si wadajir ah u wada qabtaan Ururka Suxufiyiinta Qaranka Soomaaliyeed ee NUSOJ iyo Ururka Suxufiyiinta Puntland (MAP) oo ah urur goboleed xubin ka ah ururweynaha NUSOJ, ayna taageereyso Wasaarada Arrimaha Dibadda ee dalka Finland ayaa qeyb ka ah mashruuc saddex sano oo Ururka horumarinta Saxaafadda Finland ee VIKES ku taageerayo horumarinta suxufiyiinta Soomaaliyeed iyo warbaahinta guud ahaan.
Furitaankii tababarka oo lagu casuumay suxufiyiin ka kala yimid gobolada kala duwan ee Puntland ayaa waxaa ka hadlay Xoghayaha Guud ee NUSOJ, Md. Mohamed Ibrahim, Xoghayaha Guud ee MAP, Marwo Faadumo Mohamed Mohamoud, Abdiweli Hashi oo ah Suxufi khabiir ah oo ka yimid dalka Finland iyo Peik Johansson, xiriiriyaha mashruuca iyo Wasiirka Warfaafinta Puntland, Md. Cabdiweli Xersi Cabdulle iyo mari sharaf kale.
Ugu horeyn, waxaa ka hadlay Xoghayaha Guud ee Ururka Suxufiyiinta Qaranka Soomaaliyeed ee NUSOJ, Md. Maxamed Ibrahim oo ka warbixiyay tababarka iyo muhiimada uu u leeyahay suxufiyiinta Soomaaliyeed, gaar ahaan kuwa ka shaqeeya Puntland, iyadoo tababarku jamcinayo aqoonta tababaryaal Somali iyo Finnish ah. Waxa uuna u rajeeyay in suxufiyiinta ka qeybgalay tababarka ay ka faa’iideysan doonaan. Xoghayaha Guud ee NUSOJ ayaa uga mahadceliyay Ururka Suxufiyiinta MAP iyo wasaaradda Warfaafinta ee Puntland sida wanaagsan ee ay u soo dhoweeyeen, uguna muujiyeen wada shaqeynta.
Xoghayaha Guud ee ururka Suxufiyiinta Puntland ee MAP, Marwo Fadumo Maxamed waxa ay ku soo dhoweysay Puntland masuuliyiinta NUSOJ iyo VIKES, iyadoo tiri, “welcome to Puntland, gaar ahaan Maxamed Ibrahim (Bakistaan) oo ah Xoghayaha Guud ee Ururka Suxufiyiinta Qaranka Soomaaliyeed iyo martida inala joogta ee Peik Johansson iyo Abdiweli oo aan iyagana leenahay welcome to Puntland, welcome to the capital. Sidoo kale, waxa ay uga mahadcelisay waqtigooda qaaliga ah ee masaafada intaa la eg u soo gooyeen inay howshan inala qabtaan. Waxaanu leenahay waan idinkaga mahadcelineynaa.
“Tababarkan sida aad aragtaan waxa uu ku saabsan yahay mabaadii’da saxaafadda, xorriyada hadalka iyo anshaxa saxaafadda” ayay tiri Marwo Fadumo, Xoghayaha Guud ee Ururka Suxufiyiinta Puntland ee MAP, iyadoo sheegtay sababaha loo soo celceliyo tababarda nuucan ah ay tahay faaiidada uu leeyahay, waayo waa aas-aaskii oo ah halka saxaafaddu ay ka dhisanto.
Peik Johansson, Isuduwaha Barnaamijyada ee VIKES in ay si dhow ay wadashaqeyni kala dhexeyso suxufiyiinta dalal kala duwan oo Soomaaliya ka mid tahay, isagoo intaa ku daray in tababarka halkan uu socon doono saddex cisho, kuna saabsan mabaadii’da aasaasiga ah ee saxaafadda, Anshaxa iyo muhiimadda xoriyadda hadalka, isagoo sheegay in tababarkani uu qeyb ka yahay barnaamij tababar oo loogu tala galay wariyayaasha Soomaaliyeed iyo warbaahinta Soomaaliya guud ahaan.
Wasiirka Warfaafinta Puntland, Md. Abdiweli Hirsi Abdulle ayaa sheegay furitankii tababarka “Waxaan aad ugu faraxsanahay in aan idinka qeyb galo siminaarkan ka dhadhanka badan ama ka value iyo qiimaha badan siminaaro badan oo aan iskala qeyb galnay, waayo wuxuu jamcinayaa Puntland, Somalia-yadi kale iyo wadamada hadda la yiraahdo oo adduunka hada ugu horeeya ee Europe-ta Bari e Scandanivian-ka ah oo hadda wadamada ugu horumarka badan xagga saxaafada, degenaanshaha iyo barwaaqadaba.
Wasiirka ayaa ku daray in in siminaarkan maanta uu dhadhan gaar ah waayo waxaa ka muuqaneysa tababarayaasha sida Cabdiweli Xaashi waddaniyad gaar ah oo dad badan oo hadda dalka jooga aanay qabin, isagoo ku dhiirigeliyay in suxufiyiintu ay tababarka ka faa’iideystaan. Isagoo sidoo kale ku dhiirigeliyay suxufiyiinta ka qeyb qaadashada nabadda iyo barnaamijyada horumarineed, isla markaan uga mahadceliyey Ururka Suxufiyiinta Qaranka iyo VIKES iyo MAP taabogelinta tababarkan.
Tababarka ayaa waxaa casharo ka bixinayay tababarayaal aqoon u leh saxaafadda, iyadoo ka qeybgalayaasha si firfircoon uga qeyb qaateen tababarka, sheegeyna inay wax badan ka faa’iideysteen, kana codsaday hay’adaha NUSOJ, MAP iyo VIKES in ay kordhiyaan tababarada sare loogu qaadayo.
Ururka Suxufiyiinta Qaranka Soomaaliyeed ayaa horey u sheegay in sanadka 2015 tababarada la gaarsiin doono suxufiyiinta gobolada kala duwan ee dalka jooga, iyadoo NUSOJ ay tababaro kala duwan gaarsiin doonto suxufiyiinta gobolada dalka jooga.
