Agaasimaha Guud ee Wasaaradda Warfaafinta Soomaaliya ayaa xeray tababar ku saabsan hal abuurka waxsoosaarka Warbaahinta Bulshada.
36 suxufiyiin ah oo kala socday Warbaahinta gaarka ah, Warbaahinta dowlad goboleedyada, Gobolka Banaadir iyo Warbaahinta Qaranka ayaa tababar ku saabsanaa hal abuurka waxsoosaarka Warbaahinta Bulshada, waxaana tababarku socday muddo afar maalmood ah 13kii ilaa 16ka Juna, Waxaana 16 ka mid ah ay ahaayeen haween.
Tababarkan oo ay qabatay Wasaaradda Warfaafinta, Dhaqanka iyo Dalxiiska JFS waxaa taageeray xafiiska Qaramada Midoobay ee Soomaaliya.
Agaasimaha Warbaahinta Cusub ee Wasaaradda Warfaafinta Mudane Cabdishakuur Cali Axmed ayaa sheegay in Hey’adaha Warbaahinta iyo wariyayaasha looga baahanyahay la qabsiga Warbaahinta casriga oo wax badan ka badashay halkii hore ay u shaqaynayeen Warbaahinta
Agaasimaha Shaqaalaha iyo Tababarrada Wasaaradda Warfaafinta Soomaaliya Cabdiraxiin Ciise Caddoow ayaa tilmaamay in Wasaaraddu kordhin doonto tababarrada muhiimka ah ee la xiriira Warbaahinta casriga ah.
Agaasimaha Guud ee Wasaaradda Warfaafinta, dhaqanka iyo dalxiiska JSF Mudane Cabdullaahi Xayir Ducaale oo soo xeray tababarka ayaa ku dhiira galiyay suxufiyiinta ka qeyb gashay in hirgaliyaan casharadii ay ka barteen, waxaa u mahadceliyay macalimiintii bixisay tababarkan iyo Xafiiska Qaramada Midoobay ee taageeray in uu qabsoomo.
Ka qeyb galayaasha tababarkan ayaa waxaa la guddoonsiiyay shahaadoyin caddeynaya tababarka ay qaateen, waxaana ay u mahad celiyeen Madaxda Wasaaradda Warfaafinta, Dhaqanka iyo Dalxiiska Soomaaliya iyo macalimiintii bixisay casharadii ay qaateen.
