Tababarkan oo socday muddo afar maalmood ah ayaa Wasaaradda Arrimaha Gudaha iyo Federaalka waxay u qabatay 27 xubnood oo ka mid ah howl wadeennadan Mashruuca Xasilinta goobaha laga xoreeyay kooxaha Nabad diidka ah ee dalka.
Soo celinta rajada Bulshada ee deeganada nabad-diidka laga saaray, bilaabidda Adeegyada Bulshada iyo sidii ay wax u wada qabsan lahaayeen ayaa ka mid ahaa waxyaabihi la barayay ka qeyb galayaasha tababarka oo ka kala yimid 15 dagmo oo ka mid ah kuwa dhawaan gacanta u soo galay dowladda Federaalka Soomaaliya, waxaana muhiimadiisu ahayd xoojinta iyo tayaynta howlwadeenada.
Xoghayaha joogtada ah ee Wasaaradda Arrimaha Gudaha iyo Federaalka Prof Yaxye Cali Ibraahim oo soo xiray tababarka howlwadeenada mashruucan ayaa sheegay inay bud-dhig u yihiin dhismaha Dowladaha Hoose iyo baahinta awooda Dowladda Dhexe.
”Waxaan idiin kaga hambalyaynayaa inaad qaadateen tababarkan oo muhiiim u ah howlaha aad qabateen mudadii afarta maalmood aheed ee la soo dhaafay, waxaad lafdhabar u tihiin hirgalinta Nidaamka Dowliga ah, waxaa hadda socda dhismaha Dowladaha Hoose waxaadna u tihiin bud dhig barnaamijka wadajir oo muhiimadiisu ay tahay dhismaha dowladaha hoose ee dalka iyo hormarintoodu iyo sidii adeegga bulshada dadka loo gaarsiin lahaa” ayuu yiri Xogaha Joogtada ah ee Wasaaradda.
Shahadooyin ayaa la gudoonsiiyay howlwadeenadii ka qeyb galay tababarka.
Mashruuca xasilinta oo ah mid la fal galaya howlgallada dib u xoreynta goobaha Nabad-diidku ay ku sugan yihiin ayaa inta badan waxa laga hirgaliyay deegaanadii ay Ciidamada Qaranku kala wareegeen Maleeshiyada Alshabaab.
