Muqdisho, December 2, 2016 – In ka badan 27 xubnood ayaa kasoo qeyb galay tababar socday afar cisho oo looga gol-lahaa sidii kor loogu qaadi lahaa xirfada iyo aqoonta shaqaalaha dowladaha hoose. Tababarka oo ka dhacay Hotel Coconut ayaa waxaa wadajir usoo qaban-qaabiyay Xafiiska Xasilinta ee ka tirsan Wasaaradda Arrimaha Gudaha iyo Federaalka iyo Xafiiska Ergayga Gaarka ah ee Qaramada Midoobay, kuwaas oo taageera howlaha xasilinta ee ka socda degmooyinka ay dhowaan dowladda gacanta ku dhigtay.
“Hawl-wadeenadu waxay laf-dhabar u yihiin dadaaladda xasilinta ee ka hanaqaaday degmooyinka dowladu dib ula wareegtay” ayuu yiri Xoghayaha Wasaaradda, Dr. Yaxye Ali Ibrahim, oo hadal ka jeediyay munaasabada furitaanka tababarka.
Wuxuu intaas ku daray, “tababarkan waxaa looga gol leeyahay in la kobciyo xirfada iyo tayada shaqaalaha ka howlgala degmooyinka dowladu dib-ulawareegtay. Shaqada ugu mihiimsan xiiriyayaasha iyo kalkaaliyayaasha degmooyinku waa in ay xoojiyaan sidii loo hormarin lahaa xiriirka ka dhexeeya degmooyinka iyo maamul goboleedyada.”
Tababarka ayaa waxaa lagu soo bandhigay hanaanka iibka iyo maaliyada, qaabka loo cabiro degmooyinka nugul iyo kuwa xasiloon, habka warbixinta loo gudbiyo, maareynta khilaafka, tiiraanyo bixinta iyo ka-feejignaanta halista oo dhamaantood muhiim u ah shaqaalaha dowladdaha hoose.
“Hadaba, ma ahan markii ugu horeysay oo tababar noocan ah ay bixiso Wasaaradda. Waxaa hada ka hor dhacay mid lagu xoojinayo farsamada iyo xirfada shaqaalaha si loo horumariyo howlaha xasilinta ee ka socda degmooyinka muhiimka ah.
Sidoo kale, Wasaaradda waxaa ka go’an in ay gacan ka geysato tayeynta xirfada shaqaalaha, gaar ahaan, degmooyinka ay dowladdu dhawaan kala wareegtay argagixisada iyo kooxaha nabad-diidka ah.
DHAAMAD
