RADIO MUQDISHO:-Xoghayaha Guud ee Isbahaysiga Dalalka Islaamka ee Ciidamada La-dagaallanka Argagixisada (IMCTC), Sarreeye Gaas Maxamed bin Saciid Al-Moghidi, iyo Agaasimaha Guud ee Difaaca ee Wasaaradda Gaashaandhigga XFS, Mudane Cabdulqaadir Maxamed Abuukar, ayaa maanta magaalada Muqdisho si wadajir ah uga furay tababar qeyb ka ah Hindisaha Istaraatiijiga ah ee “Wariyayaasha Nabadda”.
Tababarka oo socon doona afar maalmood ayaa diiradda lagu saarayaa falanqaynta farriimaha xagjirnimada iyo hadallada nacaybka ee lagu faafiyo baraha bulshada, iyo adeegsiga qalabka iyo teknoolojiyadda casriga ah ee lagula tacaalayo dacaayadaha argagixisada.
Ka qeybgalayaasha, oo ka kala socda warbaahinta dowladda, warbaahinta gaarka ah iyo dadka saamaynta ku leh baraha bulshada, ayaa lagu tababari doonaa aqoonsiga iyo falanqaynta farriimaha marin-habaabinta ah ee kooxaha argagixisada, iyo diyaarinta farriimo wax ku ool ah oo lagu wacyigelinayo bulshada, laguna xoojinayo nabadda iyo wadajirka.
Barnaamijkan ayaa qeyb ka ah iskaashiga Soomaaliya iyo Isbahaysiga ee xoojinta kaalinta warbaahinta ee la-dagaallanka argagixisada, tayeynta xirfadaha shaqaalaha warbaahinta iyo ka hortagga faafinta fikirka xagjirka ah.
Munaasabadda waxaa sidoo kale ka qeybgalay Ergayga Soomaaliya u qaabilsan Isbahaysiga Dalalka Islaamka ee Ciidamada La-dagaallanka Argagixisada, Sarreeye Guuto Cabdiraxmaan Maxamed Tuuryare, iyo saraakiil ka socotay Isbahaysiga.
