Taliye Ku-xigeenka ciidanka Booliska Soomaaliyeed Sareeye Guuto Zakiya Xuseen Axmed oo shir jaraa’id ku qabatay magaalada Muqdisho ayaa warbaahinta uga warbixisay howlgallada maalmahaan ka socdo caasimadda iyo waxyaabaha kusoo kordhay.
Jeneraal Zakiya ayaa sheegtay in ciidanka Booliska uu dardar geliyey howlgalada ammaanka lagu adkeynayo, iyadoo xustay in ciidamada ay wadaan howlgallo guri walba oo ku yaalla caasimada lagu baarayo, si magaalada looga sifeeyo hubka sharci darrada ah.
Zakiya Xuseen Axmed ayaa xustay in hab cusub lagu soo kordhiyey baarista Gaadiidka, kaasi oo sahlaya in muddo kooban Gawaarida lagu Xaqiijiyo, waxaana ay tilmaamtay in ciidamada ammaanka lagu qalabeeyey agab u fududeynayo howlahooda shaqo.
Taliye ku-xigeenka Ciidammada Booliiska Soomaaliya Jeneraal Zakiya Xuseen Axmed ayaa sheegtay in ciidanka Amniga ay miinooyin ka soo saareen deegaanka Weydoow ee duleedka Muqdisho.
“Intii ay ciidamada ku guda jireen howlgalkooda, waxa ay ku guuleysteen inay soo saaraan miinooyin ay argagixisada geliyeen deegaanka Weydoow ee duleedka Muqdisho, miinada waxaa la geliyay wadada dhinaceeda, taasi oo aan aaminsannahay in loogu dan lahaa sidii shacabka loogu dhibaateyn lahaa” ayay tiri Jeneraal Zakiya.
Taliye ku-xigeenka Ciidammada Booliiska Soomaaliya ayaa bulshada Soomaaliyeed ku wargelisay inay muujiyaan taxadar dheeraad ah, maadaama gaari nuuca Baraado loo yaqaan oo la tuhunsayahay in uu ku jiro magaalada, isla markaana cidda aragta ay ku soo wargeliyaan ciidamada booliska.
Sareeyo Guuto Zakiya Xuseen Axmed ayaa hoosta ka xariiqday in ciidamada ay sii xoojin doonaan adkeynta ammaanka caasimadda, iyagoo ku shaqeyn doona xogaha ay ka heleen sirdoonka, si looga hortago dhagarta ay maleegayaan argagixisada Al-Shabaab, waxaana ay ku baaqday in la yareeyo isticmaalka gawaarida yar yar ee magaalada lagu dhex wato.
