Taliska Ciidanka Soomaaliyeed ayaa maanta lagu wareejiyay 56 gaadiid oo ay isticmaalaan ciidamada, kaasi oo ay ugu deeqday dowladda Jabaan..
Munaasabad kooban oo gaadiidka lagu guddoonsiinayay taliska ciidanka booliska ayaa waxaa ka qeyb galay Wasiirka amniga gudaha, taliyaha ciidanka booliska, saraakiil ka tirsan cidamada booliska, kuwa AMISOM iyo saraakiil kale oo ka socotay Qaramada Midoobay.
Taliyaha ciidanka booliska Sareeyo Gaas Maxamed Sheekh Xasan Xaamud oo ka hadlay munaasabadda ayaa ugu horeyn dowladda Jabaan uga mahadceliyay sida ay u garab taaganyihiin ciidanka booliska.
“Waxaan dowladda Jaban uga mahadcelineyaa sida ay u caawiyaan ciidanka booliska, marar badan ayay ciinka ugu deeqeen gaadiid, waxaana ka fileynaa in goordhaw ay nagu soo wareejin doonaan dhar ciidan” ayuu yiri Taliyaha ciidanka booliska.
Tomohiro TOMMATSU oo ah u qeybsanaha dhanka gaashaandhigga safaaradda Jabaan ee Soomaaliya ayaa sheegay in gaadiidkan ay ugu talagaleen inay ku caawiyaan ciidanka booliska Soomaaliyeed.
“Gaadiidkan waxaan ugu talagalnay in ciidanka booliska ay ugu adeegaan bulshada, runtii aad ayaan ugu faraxsanahay in maanta aan ciidamada ku wareejino gaadiid”
Wasiirka amniga gudaha Mudane Cabdirisaaq Cumar Maxamed ayaa sheegay in gaadiidka lagu wareejiyay taliska ciidanka booliska uu qeyb weyn ka qaadan karo howlaha ay u hayaan bulshada ee ah ka hortagga kuwa maleegaya amni darrada.
“Runtii dowladda Jaban waxa ay ka midtahay dowladaha caawiya Soomaaliya, runtii aad baan u soo dhaweyneynaa sida ay u garab taaganyihiin ciidanka booliska, taliska ciidanka waxaan ku bogaadinayaa inay sii labo jibaaraan adeegyada ay bulshada u hayaan” ayuu yiri Wasiirka Amniga gudaha.
Dowladda Jaban ayaa dhowr jeer oo hore waxa ay ciidanka booliska ku wareejiyeen gaadiid, taasi oo qeyb weyn ka qaadan karto howlaha ay ciidamada ku sugayaan amniga.
