Taliska Ciidanka Xoogga dalka Soomaaliyeed ayaa faah-faahin ka bixiyay qasaaraha Al-Shabaab lagu gaarsiiyey Howlgalkii deegaanka Janaale.
Kornayl, Cabdiqani Shabeel oo ka mid ah saraakiisha ciidanka Xoogga Dalka Soomaaliyeed ee hoggaaminaysa howlgallada ka socda Shabeellada Hoose ayaa sheegay in ay dileen 142 ruux oo ka mid ahaa horjoogayaasha iyo malleshiyada Al-Shabaab.
Kornaylka oo la hadlayay warbaahinta Qaranka ayaa intaas ku daray in 29 ruux ay dhaawaceen, halka 18 kalana ay xabsiga dhigeenm, kuwaasi oo nolosha lagu qabtay.
“142 maleeshiyo ayaan ka dilnay dhagar qabayaasha Al-Shabaab, halka aan ka dhaawacnay 29 ruux, waxnaana maxaabiis ahaan u haynaa 18, kuwaasi oo xabsiga la dhigay” ayuu yiri Kornayl, C/qani Shabeel
Ciidanka Xoogga Dalka ayaa 1,500 oo qoys u fidiyay gargaar kala duwan intii uu howl-galku socday, kuwaas oo ka cararay dhibaatadii ay cadowga ku hayeen, balse dib ugu soo laabtay magaalada Jannaale markii ay ciidanka xoogga la wareegeen.
