11-ka nin ee lagu soo bandhigay xarunta Taliska ciidanka 12-ka April ee xoogga dalka Soomaaliyeed ayaa ah kuwa ay ciidamada xoogga ka soo qabteen inta u dhexeysa Janaale iyo Degmada Qoryooleey iyaga iyo hubkooga, kuwaasi oo lagu tuhmayo inay ka dambeeyeen gaadiid shacab oo lagu gubay deegaannadaasi iyo dad kale oo rayid ah oo iyana lagu dilay Gobolka Shabeelaha Hoose.
Taliyaha ururka 30aad guutada 5aad ee qeybta 12-ka April ee ciidanka Xoogga Dalka Soomaaliyeed Gaashaanle Dhexe Axmed Absuge Cabdulle ayaa sheegay in ragaasi lagu soo qbatya howlgallo ay ciidamada ka sameeyeen deegaanno ka tirsan gobolka Shabeelaha Hoose oo watay 7 qori, wxaaana uu intaa ku daray in ay hayaan ehelada dadkii ay dileen ragga maanta saxaafadda loo soo bandhigay
“Howlgallo maalmahaan oo dhan socday ayaa waxaan ku soo qabanay maxaabiista aad u jeedaan, oo hubeysan, waa ururka Al-Shabaab, waa nimankii baabuurta ku gubi jiray, qoryooleey iyo janaale inta ka dhexleh, dadka ku dhici jiray, soo booddo ahaan meesha u geli jiray, nimankan waa niman caadeystay, inay Ummadda dhibaateeyaan, waxaa lagu gubay 5 baabuur wadadaas, 18 qofna waa lagu dilay” ayuu yiri G/dhexe Axmed Absuge Cabdulle.
Madaxa Waaxda Siyaasadda ee Qeybta 12-ka April ee ciidanka Xoogga Dalka Gaashaanle sare Yuusuf Cali Cageey ayaa hoosta ka xariiqay inay ka war hayeen kiiska maleeshiyaadka la soo bandhigay, ayna u gudbinayaan Maxkamadda si loo marsiiyo calaadda, isagoo ciidanka xoogga dalka ku ammaanay doorka ay ka qaateen soo qabashada raggaasi lala xiriirinayo inay ka tirsanyihiin UGUS.
“Sida kiiskan nagu soo gaarayo waxa ay ahayd, in niman kaba dilaaysan, ka qatarsan Al-Shabaab inay jiraan oo dadka hilbahooda goo gooyo, oo weliba suubsaday, xirfado kale oo gaar ah, waa lagu daba jiray, maantana waad u jeediin hubkooda iyo wajigooda, marka waxaan u gudbineynaa Maxkamadda iyo cidda ay quseyso, xoogga dalka cid maxkamad ma saaro ee wuu soo qabtaa, wuuna bur buriyaa, libinteena waan ku guuleysanay, waxaan sugeynaa libinta Maxkamadda” ayuu yiri G/sare Cageey.
Ciidamada xoogga dalka guuto shanaad ee ka howlgalla gobolka Shabeelaha Hoose ayaa u taagan inay sugaan amniga bulshada gobolkaasi ku nool, isla markaana ay ka hortagaan cidkasta oo wax u dimaysa amniga.
SAWIR QAADE QADAR CALI NUUR
