Taliyaha ciidanka booliiska Soomaaliyeed ayaa ka qeybgalay xalay munaasabad sare loogu qaadayay wada shaqeynta ciidanka booliiska iyo bulshada oo xalay lagu qabtay xarunta degmada Yaaqshiid ee magaalada Muqdisho, iyadoo Taliyaha uu si wada jir uu ula afuray ciidamada ka howlgala degmadaasi ee Boliiska iyo dadweynihii ka qeyb galay munaasabadaasi.
Munaasabadda ayaa waxaa ka qeybgalay saraakiil ka tirsan ciidanka Booliiska, kooxda Bambeyda Heegan, mas’uuliyiinta maamulka degmada yaaqshiid iyo marti sharaf kale.
Guddoomiyaha degmada Yaaqshiid Cismaan Maxamuud Cadaawe oo munaasabadda ka hadlay ayaa tilmaamay in ciidamada booliiska ee ka howlgala degmada Yaaqshiid ay wada shaqeyn wanaagsan la leeyihiin bulshada deegaanka.
Generaal Maxamed Sheekh Xasan Xaamud taliyaha ciidanka Booliiska Soomaaliyeed ayaa halkaasi ka sheegay in ciidamada looga baahanyahay in soo dhaweeyaan bulshada, islamarkaana sidoo kale bulshada looga baahanyahay iney ciidamada kala shaqeeyaan sugidda nabadgelyada.
