Taliyaha Ciidanka Booliska Soomaaliyeed Sarreeye guuto Bashiir Cabdi Maxamed “Ameeriko” oo uu wehliyo Wakiilka gaarka ah ee Qaramada Midoobay u qaabilsan Arrimaha Soomaaliya Michel keating iyo Masuuliyiin kale, ayaa kormeer hal maalin ah ku tagay magaaladda Gaalkacyo ee Gobolka Mudug.
Wafdiga uu hoggaaminayo Taliyaha Ciidanka Booliska, ayaa waxaa garoonka diyaaradaha ee Cabdullaahi Yuusuf kusoo dhoweeyey Saraakiil iyo Masuuliyiin ka kala tirsan Dowlad goboleedyada Puntland iyo Galmudug, waxaana halkaasi taliyaha uu salaam sharaf kaga qaatay Cutubyo ka tirsan Booliska.
Taliyaha Ciidanka Booliska Soomaaliyeed iyo Wakiilka gaarka ah ee Qaramada Midoobay u qaabilsan Arrimaha Soomaaliya, ayaa kormeeray Xarunta ay ku shaqeeyaan Ciidanka Booliska ee isku dhafka ah ee Puntland iyo Galmudug, waxaana Taliyaha uu warbixin ku saabsan ammaanka magaaladda uu ka dhageystay saraakiisha Xaruntaasi ku sugan.
Wakiilka gaarka ah ee Qaramada Midoobay u qaabilsan Arrimaha Soomaaliya Michel keating, ayaa sheegay in magaaladda Gaalkacyo hadda ay sameysay horumar ballaaran, waxaana uu tilmaamay in muddo yar ka hor mar uu yimid magaaladda hadda ay ka duwan tahay, ifafaalo nabadeedna ay muuqaneyso.
Taliyaha Ciidanka Booliska Soomaaliyeed Sarreeye guuto Bashiir Cabdi Maxamed “Ameeriko”, ayaa dhankiisa sheegay in wax lagu farxo ay tahay Nabadda ka jirta hadda magaaladda Gaalkacyo ee Gobolka Mudug, isaggoo kula dardaarmay Ciidanka Booliska ee isku dhafka ah inay laba jibaaraan shaqadooda, ayna u naxariistaan dadka Shacabka ah.
Gen. Bashiir Ameeriko, ayaa Bulshadda ku nool magaaladda Gaalkacyo ugu baaqay in Ciidanka ay kala shaqeeyaan Sugida nabad gelyada, waxaana uu tilmaamay dagaal qasaaro maahee faa’iido uusan laheyn.
“ Ummadda ku nool magaaladda Gaalkacyo way ka daashay dagaal iyo colaad, waa in markaan aan u soo jeesano siddii gaalkacyo ay ku heli laheyd Nabad buuxda iyo Horumar ballaaran, magaaladaan qiimo ayey ugu fadhisaa Ummadda Soomaaliyeed, waana in Bulshadda ku nool ay Ciidanka ku gacan siiyaan sugida ammaanka, waxaa wax lagu farxo ah in Ciidanka iyo Bulshadda ay iskaashanayaan” ayuu yiri Taliyaha Ciidanka Booliska.
Ugu dambeyn Taliyaha Ciidanka Booliska iyo Wafdigii uu hoggaaminayey, ayaa waxay ka dukaameysteen Suuqa weyn ee Magaaladda Gaalkacyo, isaggoo ganacsatada uga mahad celiyey kaalintii ay ka qaateen Nabadeynta Magaaladda.
