Taliyaha Ciidanka Xoogga Dalka Soomaaliyeed Gen.Ibraahim Sheekh Muxudiin ayaa sheegay in dalku uu galay dagaalkii ugu dambeeyay ee khawaarijta looga saari lahaa Soomaaliya.
Taliye Muxudiin oo waraysi siiyay warbaahinta Qaranka isagoo ku sugan furimaha hore ee dagaalka ayaa intaa ku daray in dagaalka ka dhanka ah khawaarijta laga gaaray guulo fara badan, kuwaas oo dadka iyo dalka ku hayay dhibaatooyin kala duwan.
Taliyaha Ciidanka Xoogga Dalka Soomaaliyeed Gen.Ibraahim Sheekh Muxudiin ayaa sheegay in qasaara lixaad leh uu khawaarijtu kasoo gaaray dhammaan goobihii laysku haleelay, halka meelaha qaarna ay isaga baxeen si fududna lagu qabtay.
Taliyaha ayaa sheegay in jihooyinka kala duwan ee uu Ciidanku ka weeraray cadowgu ay guulo waaweyn ka gaareen, laguna deegaanno fara badan, sida ugu dhaqsiyaha bandanna ay ku gaari doonaan Ceel-buur iyo Gal-hareeri.
“Aagga Maxaas halka la yiraahdo Wabxo ayuu ciidanku soo gaaray, Guri-ceel-na wuxuu soo gaaray War-xoolo, isagoo kusii socdo Ceel-buur, Aagga la yiraahdi Cali Axmed, Bud-bud iyo Geriyaale ayuu ku socdaa, labada magaalo ee muhiimka ahna sida ugu dhaqsiyaha badan ayaan ku gaaraynaa hadduu Alle idmo”.
Taliyaha Ciidanka Xoogga Dalka Soomaaliyeed Gen.Ibraahim Sheekh Muxudiin ayaa ugu dambayn sheegay in dagaalka ka dhanka ah khawaarijta wejigiisa koobaad uusan ku qaadan doonin laba toddobaad.
